Бейсенбі, 12 қаңтар күні қалалық әкімдікте Семей қалалық қоғамдық кеңесінің отырысы өтті. Шараға қала әкімі Нұрбол Нұрсағатов, қалалық мәслихат хатшысы Бейсенбек Ақжалов және Қоғамдық кеңес мүшелері қатысты.
Жиында қала әкімі Нұрбол Нұрсағатов қоғамдық кеңес мүшелерін 2023 жылы атқарылатын жұмыстардың жоспарымен таныстырды. Шаһар басшысының айтуынша, қаланың экономикалық, инфрақұрылымдық, әлеуметтік, өнеркәсіп салаларына жалпы бюджеттен 84 млрд қаржы бөлінді. Оның ішінде электр энергиясы, автомобиль жолдары, жол-көлік инфрақұрылымы жылу сынды жақын арада шешуді талап ететін салалар да бар. Кеңес барысында қала әкімі, қаланың бас жоспарына сәйкес, жобалардың аумағын, орналасатын жерін, эскизін де таныстырды. Сонымен қатар қаланы заңсыз жарнамалар мен мемлекеттік тіл заңына сай келмейтін жарнамалардан арылту үшін тиісті жұмыстар жүргізіліп жатқандығын айтып өтті.
— 2023 жылы жүзеге асыруды көздеп отырған жоспарларымыз өте көп. Кездесу қорытындысы бойынша проблемалық мәселелерді шешу жөніндегі іс-шаралар жоспары кезең-кезеңімен жүзеге асырылады, — деді қала әкімі Нұрбол Төлегенұлы.
Жиын барысында Қоғамдық кеңес мүшелері өздерін толғандырған сұрақтарын қойып, қала басшысынан тиісті жауаптар алды.
Семей қаласының әкімдігі
