Көктемгі әскерге шақыру науқаны барысында Солтүстік Қазақстан және Павлодар облыстарының жас сарбаздары Абай гарнизонына қарасты 30217 әскери бөліміне шақырылды. Әскери бөлім табалдырығын алғаш аттаған сарбаздар бөлімдегі лауазымды тұлғалармен, сондай-ақ олар қызмет ететін әскери бөлімнің құрылу тарихымен танысты.
Әскери бөлімде жас сарбаздардың келуіне барлық қолайлы жағдайлар жасалған. Тәжірибелі офицерлер мен білікті сержанттар сарбаздарға жаңа жағдайларға бейімделуге көмектесіп, әскери іс негіздерін үйретеді. Жас сарбаздар алдымен жалпы әскери дайындық бағдарламасынан өтеді. Бағдарлама барысында күнделікті қызметтік іс-әрекеттің түрлері мен әскери дағдыларды игереді. Даярлық бағдарламасы аяқталғаннан кейін мерзімді қызметтегі әскери қызметшілер салтанатты түрде әскери ант қабылдайды.
— Мен Павлодар облысының Аққулы ауданынан «Шығыс» өңірлік қолбасшылығына қарасты 30217 әскери бөлімге шақырылдым. Жалпы, маған Абай гарнизоны таңсық емес. Себебі студенттік шағымды Семей қаласында өтті. Ал енді Отан алдындағы борышымды Абай гарнизонында өтейтін боламын. Бұл мен үшін қуанышты жаңалық болды. Бүгін бізді әскери бөлім жылы қабақпен қарсы алды. Менің алдағы мақсатым — Отан алдындағы борышымды адал да абыройлы атқарып шығу, — дейді 30217 әскери бөлімінің мерзімді әскери қызметшісі Мәди Айтиев.
Абай өңірлік гарнизонының баспасөз қызметі
