Абай облысы өңірлік коммуникациялар қызметінде Абай облысы бойынша мемлекеттік кірістер департаментінің оңалту және банкроттық бөлімінің басшысы Сұңғат Еркіннің қатысуымен өткен баспасөз мәслихатында «ҚР азаматтарының төлем қабілеттілігін қайта қалпына келтіру және банкроттығы туралы» Заңының орындалу барысы туралы айтылды.
Жадыра ТӨЛЕГЕНҚЫЗЫ,
Semeı tańy
ҚР Мемлекет басшысының жарлығымен 2022 жылғы 30 желтоқсанда «Қазақстан Республикасы азаматтарының төлем қабілеттілігін қалпына келтіру және банкроттығы туралы» Заң қабылданды. Бұл заң негізгі үш түрлі рәсімді қамтиды — соттан тыс банкроттық, сот банкроттығы және төлем қабілеттілігін қалпына келтіру рәсімдерін қарастырады.
Айта кетерлігі, аталған рәсімдерге тек борышкер ғана өтініш бере алады, яғни несие берушінің немесе өзге кредиторлардың борышкерге қатысты бұл рәсімдерді бастауға құқығы жоқ.
— Азаматтар соттан тыс банкроттыққа өтініштерді тұрғылықты жері бойынша халыққа қызмет көрсету орталықтарына жүгініп немесе «Электрондық үкімет» веб-порталы арқылы қалдыра алады. Өтініштер биылғы жылдың 3 наурызынан бастап қабылдануда. 15 жұмыс күні ішінде өтініш сарапталып, тиісті хабарлама жолданады. Соттан тыс банкроттық рәсімі қолданылған жағдайда алты ай ішінде азаматтың қаржылық жағдайы тексеріледі. Осыдан кейін ғана соңғы шешім шығарылып, кредиторларға қорытынды жіберіледі, — дейді Сұңғат Еркінұлы.
Азаматтардан өтініштер қабылдау бастау алған күннен бастап соттан тыс банкроттық рәсіміне Абай облысының азаматтарынан 1600-ден аса өтініш түскен. Оның ішінде 1100-ден астам өтініш кері қайтарылса, 300-ден аса өтініш бойынша соттан тыс банкроттық рәсімін қолдану жайлы алдын ала шешім қабылданған.
— 1100-ден астам өтініштің кері қайтарылу себебі — кредиторлардың алдындағы борышты реттеу хатының болмауы. Азаматтар, негізінен, екінші деңгейлі банктер мен микроқаржы ұйымдары алдындағы қарыздары үшін жүгінуде. Заң аясында 6 ай ішінде атаулы әлеуметтік көмек алатын және 5 жылдан астам уақыт қарызы өтелмеген азаматтар үшін ерекше жағдайлар қарастырылғанын айта кеткен жөн. Соттан тыс банкроттық рәсімін қолдану жайлы алдын ала шешім қабылданған 300-ден астам өтініштің көбі осы екі жағдайға сәйкес келеді. Наурыз айында күніне 50-60 өтініш келіп түссе, бүгінде орта есеппен бес-алты өтініш қабылдануда,- деді Сұңғат Еркінұлы.
Айта кетерлігі, банкроттықтан кейін азаматтардың қаржылық жағдайына алғашқы үш жылда мониторинг жүргізіліп, 5 жылға дейін несиелер мен кредиттер алуға шектеу қойылады. Ал банкроттыққа қайта жүгіну үшін жеті жыл уақыт өтуі керек.
