Semeytany.kz – Абай облысының әкімі Берік Уәли Аягөз қаласындағы орталық аудандық аурухана жанынан бой көтерген жаңа реанимация бөлімшесінің жұмысымен танысты. Жоба «Ауылдық денсаулық сақтауды жаңғырту» ұлттық бағдарламасы аясында жүзеге асырылды.
1976 жылы пайдалануға берілген аудандық аурухана бүгінде 220 орындық стационармен және ауданға қарасты барлық емдеу мекемелерімен бірлесіп жұмыс істейді. Мұнда 800-ге жуық медицина қызметкері еңбек етіп, 50 мыңға тарта тұрғын медициналық көмек алады.
Жаңа реанимация бөлімі 10 төсекке есептелген. Бұған дейін реанимация бейімделген, тар бөлмеде орналасып келген болса, енді кең де жарық ғимаратта жеке оқшауланған палаталар, диализ бөлмесі, бейнебақылау жүйесі, қан сақтайтын қойма, дәрігерлердің жұмыс және демалыс бөлмелері қарастырылған.
Бөлімше жасанды тыныс алдыру аппараттары, мобильді рентген, жоғары сапалы УДЗ, видеофибробронхоскоп, дефибриллятор және өзге де өмірлік маңызды реанимациялық құрылғылармен жабдықталуда. Дәрігерлердің айтуынша, жыл сайын мұнда шамамен 500 науқас, соның ішінде 60-қа жуық бала емделеді деп жоспарланған. Осылайша жаңа нысан ауыр жағдайдағы пациенттерге дер кезінде жоғары деңгейде көмек көрсетуге мүмкіндік береді.
Облыстық Денсаулық сақтау басқармасының басшысы Талғат Молдабековтің мәліметінше, қазір бөлімшеде 5 дәрігер, 4 мейірбике, 4 анестезия маманы қызмет атқарады. «Құрылғылардың барлығы жаңа. Қазіргі реанимациядан бөлек, алда тағы бір маңызды жобаны бастап жатырмыз. Ауруханаға магнитті-резонанстық томограф орнату үшін жапсаржай салу жоспарлануда. Сол кезде бұл мекеме толыққанды көпсалалы аурухана мәртебесіне ие болады», – деді ол.
Жаңа нысанды аралап көрген аймақ басшысы Берік Уәли реанимация бөлімшесінің Аягөз ғана емес, көршілес аудандар тұрғындары үшін де маңызды екенін атап өтті. «Көктемде келгенімізде мұнда шаң-тозаң, құрылыс жұмыстары жүріп жатқан еді. Қазір көз қуантады. Бұл бөлімше ауыр науқастарды оңалтуға үлкен мүмкіндік береді. Жұмыстарыңызға сәттілік тілеймін», – деді облыс әкімі.
Жаңа ғимаратта ем алып жатқан тұрғындар да ризашылықтарын білдірді. «Кең, жарық ғимарат салып, Аягөз халқына жағдай жасағандарыңызға алғыс айтамыз. Дәрігерлер мен мейірбикелердің еңбегі зор. Мұндай заманауи медициналық нысан ауданымызға өте қажет еді», – дейді емделуші Күлзат Мұсабаева.
