Semeytany.kz – Абай облысының әкімі Берік Уәли Аягөз ауданына қарасты Шынқожа ауылына жұмыс сапарымен барып, бірқатар әлеуметтік нысандардың тыныс-тіршілігімен танысты.
Алдымен аймақ басшысы ауылдағы Мәдениет үйіне барды. Бұл нысан 2003 жылы Парламент Мәжілісінің депутаты, осы ауылдың тумасы Нұртай Сабильяновтың қолдауымен салынған. Мұнда 4 қызметкер еңбек етеді. Ғимаратта 180 адамға арналған көрермен залы және 3 үйірме клубы жұмыс істейді. 2020 жылы аудандық бюджет есебінен Мәдениет үйіне ағымдағы жөндеу жүргізілген. Бүгінде Шынқожа ауылында 963 тұрғын бар. Мәдениет үйінде өткен кездесуде облыс әкімі ауыл ақсақалдары мен тұрғындарының ұсыныс-пікірін тыңдады.
Берік Уәли Шынқожа батыр атындағы жалпы орта білім беретін мектепке де атбасын бұрды. 1992 жылы салынған білім ордасында 145 оқушы оқиды, 37 мұғалім еңбек етеді. Мектепте 2 спорт залы, 22 оқу кабинеті жұмыс істейді. 2022 жылы ғимарат толық күрделі жөндеуден өтті. Биыл білім ошағының 100 жылдығына орай демеушілер есебінен 6 кабинет жаңа құрал-жабдықтармен қамтамасыз етілді.
Облыс әкімі мектептің асханасын, спорт залын, оқу кабинеттерін аралап, мұғалімдермен, оқушылармен және жас мамандармен тілдесті. Шынқожаны тоғыз жолдың торабында орналасқан, береке-бірлігі жарасқан, тарихы терең ауыл екенін атап өткен Берік Уәли мектеп ұжымын ғасырлық мерейтойымен құттықтап, алдағы жұмыстарына табыс тіледі.
