Semeytany.kz – Абай облысының Бородулиха ауданына қарасты Дмитриевка ауылында «ВостокЛесИндустрия» ЖШС базасында жаңа өрт сөндіру пункті ашылды. Нысан Дмитриевка және Боровое ауылдарының тұрғындарына қызмет көрсетіп, 1151 адам мен 358 үйдің, сондай-ақ бірқатар әлеуметтік нысандардың өрт қауіпсіздігін қамтамасыз етеді.
Жаңа пункт тәулік бойы жұмыс істеуге қажетті жабдықтармен толық жасақталған. Мұнда демалыс бөлмесі, ас үй аймағы, санитарлық торап және жуынатын бөлме қарастырылған. Өрт сөндірушілер тұрмыстық, дала және орман өрттері кезінде жедел әрекет етуге бағытталған.
Нысанның ашылуына облыс әкімінің орынбасары Серік Төленбергенов пен Төтенше жағдайлар департаментінің басшысы Манарбек Шапағатов қатысып, ауылдардағы қауіпсіздікті күшейту бағытында атқарылып жатқан жұмыстарға тоқталды.
Қазіргі таңда облыс аумағында 72 өрт сөндіру пункті жұмыс істейді, соның тоғызы биыл ашылған. Бұл нысандар 94 мыңға жуық тұрғыны бар 165 елді мекеннің қауіпсіздігін қамтамасыз етеді. Жыл ішінде Зенковка, Петропавловка және Михайличенково ауылдарында да жаңа өрт сөндіру пункттері іске қосылды.
Ақсуат ауданында да өрт қауіпсіздігі күшейтіліп, жергілікті бөлімше заманауи техникамен толықты. Аудан аумағында Қызылкесік, Құмкөл, Ойшілік, Кіндікті, Көкжыра, Сәтбаев және Ырғызбай ауылдық округтерінде орналасқан 7 өрт сөндіру бекеті тұрақты жұмыс істейді. Мұнда 21 қызметкер тәулік бойы қоғамдық қауіпсіздікті қамтамасыз етеді. Биыл ауданда тіркелген 30-дан астам өрт фактісі дер кезінде сөндірілген.
«Ауыл құтқарушылары» бағдарламасы аясында Қызылкесік және Кіндікті ауылдарында жаңа өрт сөндіру пункттерінің құрылысы жүріп жатыр.
