ҚР Парламенті Мәжілісінің депутаты, «AMANAT» партиясы фракциясының мүшесі Нұртай Сабильянов Абай облысына іссапармен келді.
ҚР Парламенті Мәжілісінің депутаты Нұртай Сабильянов облыс тұрғындарымен кездесулерін Мақаншы ауылынан бастады. Сөз басында халық қалаулысы ауыл тұрғындарымен жүздесудегі басты мақсат сайлаушылармен кездесіп, олардың өтініштері мен ұсыныстарын жинау, халықтың мәселелерін шешуге жәрдемдесу, пікірлерін тыңдау және партияның сайлауалды бағдарламасын іске асыруға арналған облыстық Жол картасының орындалуын бақылау екенін атап өтті.
Кездесу барысында Мақаншы ауылының тұрғыны Әбен Разуев Мақаншы ауданын құру жұмыстары тезірек қолға алынса деген ниетін білдірді.
— Ел Президенті Түркістан қаласында өткен Ұлттық құрылтайда Мақаншы ауданын қалпына келтіру туралы шешім қабалдағанын айтқан болатын. 1997 жылы Семей облысының таратылуына байланысты Мақаншы ауданы жабылып, Үржар ауданына қосылды. Енді жеке аудан ретінде құрылуына барлық әлеуеті жеткілікті. Өңірде туризм, кен өндірісі, Қытаймен шекарадағы кеден бекеті арқылы сауда-саттық жақсы дамыған. Мақаншы ауданы құрылуы үшін тиісті әлеуметтік-экономикалық мәселелер ыңғайластырып, өңірдің инфрақұрылымының дамуына тиісті қаражат қарастырылуы керек. Бұл жұмыстар, әрине, уақытты алады. Осы мәселені көпке созбай, шешуіміз қажет. Бұл бағытта тиісті ұсыныстар жіберетін боламыз. Ауданға қарасты әр елді мекен бойынша көтерілетін сұрақтар талқылануға салынып, тиісті қаражат бөлінгеннен кейін жұмыстар қолға алынатын болады, — деді Нұртай Салихұлы.
Ауыл тұрғыны Тұрғали Қалықжанов Мақаншыға газ құбыры тартылса деген ұсынысын жеткізді. Тұрғындарды сондай-ақ, ауылдық елді мекендерде шаруалардың негізгі айналысатын кәсібі мал шаруашылығы мен егін шаруашылығы болғандықтан, механизатор, мал бағушы сияқты ауыл шаруашылығына қажетті мамандардың жоқтығы да қынжылтады.
Депутат сайлаушылардың қойған сауалдарына жауап қайтарып, түсіндірме берді. Нұртай Салихұлы Парламентте елді мекендердегі инфрақұрылымды дамыту мәселесі көтерілгенін, ал газдандыруға қатысты сұраққа орай бүгінгі күні көгілдір отынмен қамту мәселесі энергетика министрлігінде қарастырылып жатқанын айтып өтті.
— Бұл сұрақ Үкімет сағатында ауылдық елді мекендердің инфрақұрылымын дамыту мәселесі көтерілгенде қарастырылған болатын. Жалпы, осы мәселе облыс бойынша қарастырылуда. Бұл облыс экономикасының барлық салаларын дамытуды қамтамасыз етуге, экологиялық жағдайды жақсартуға, халықтың әлеуметтік деңгейін көтеруге және жеке үйлерде тұрудың жайлылығын арттыруға мүмкіндік береді. Қазіргі уақытта ҚР Энергетика министрлігі өңірлерді газдандыруды өзектендіру бойынша жұмыстар жүргізуде, — деп атап өтті мәжілісмен.
Нұртай Сабильянов тұрғындармен кездесулерден кейін азаматтарды жеке мәселелері бойынша қабылдады.
Үржар ауданына жұмыс сапары аясында Мәжіліс депутаты Малақ ауылындағы сумен жабдықтау нысандарының құрылысымен, жұмыс барысымен танысты.
Ауданның сәулет, қала құрылысы және құрылыс бөлімінің бас маманы Самат Маусымбаев Малақ ауылындағы су құбыры желілері мен су тарту құрылыстарын салу жұмыстарына техникалық қадағалау қызметі бойынша конкурс нәтижесі қайта қаралып жатқанын, жұмыстар шешім шыққан соң басталатынын атап өтті. Желінің ұзындығы 8,933 шақырым, ұңғыманың тереңдігі 55 метр. Мердігер мекеме — «НАЗ» жауапкершілігі шектеулі серіктестігі өкілінің айтуынша, жұмыс қазан айына дейін аяқталады.
Мәжіліс депутаты келесі кезекте Үржар ауданының Жоғарғы Егінсу, Айтбай, Таскескен ауылдары, Ақсуат ауданының Қызылкесік, Құмкөл, Танамырза ауылдары, Көкпекті ауданының Көкпекті, Шәріптоғай, Шұғылбай, Биғаш ауылдары, Жарма ауданындағы Шар қаласы мен Қалбатау ауылдары, Аягөз ауданының Тарбағатай, Сарыарқа, Қарағаш, Малкелді, Баршатас, Байқошқар ауылдарынның және Абай ауданының Қарауыл, Архат, Қасқабақ ауылдарының және Семей қаласының тұрғындарымен кездеседі.
«AMANAT» партиясының Абай облыстық филиалының баспасөз қызметі
