Семей таңы – 1 маусым – Халықаралық балаларды қорғау күніне орай Абай облысында ерекше форматтағы маңызды жиын өтті. «Бала әл-ауқаты – мемлекеттің қамқорлығы» тақырыбында ұйымдастырылған дөңгелек үстелге облыстың әр түкпірінен жүзге жуық бала онлайн қосылып, өзекті мәселелерді бірге талқылады, деп хабарлайды Semeytany.kz тілшісі.
Балалар – басты қатысушы әрі жүргізуші
Іс-шараға облыстық білім басқармасы, балалардың құқықтарын қорғау жөніндегі өңірлік уәкіл, білім беру саласының ардагерлері, қоғам белсенділері мен оқушылар қатысты. Алайда жиынның басты ерекшелігі – оны балалардың өздері жүргізіп, пікір айтуға, ой бөлісуге толық мүмкіндік алғаны болды.
Жиналғандар бала құқығы, қауіпсіз орта, дұрыс тәрбие және бақытты балалық шақтың маңызы туралы ашық пікір алмасты. Балалар өз ойларын бүкпесіз айтып, ұсыныстары мен тілектерін ортаға салды.
«Балалар омбудсмені кім?» – блиц-сауалнама қызығушылық тудырды
Шара аясында ұйымдастырылған блиц-сауалнама балалар мен ересектер арасында ерекше қызығушылық тудырды. Қатысушыларға «Бала құқығы деген не?», «Бақытты балалық шақ деген не?», «Балалар омбудсмені кім?», «Бүкіл әлем балаларына не тілер едің?» деген сұрақтар қойылып, өзара пікір алмасу өтті.
Бұл сұхбаттасу арқылы балалар тек тыңдалушы емес, өз ойын ашық білдіретін қоғам мүшесі ретінде көрінді.
Баланың үнін есту – қоғамның парызы
Мұндай бастама – балалардың өз құқығын білуіне, ойын еркін айтуына және қоғамдық пікірге ықпал етуіне жол ашатын маңызды қадам ретінде бағаланды. Дөңгелек үстел балалардың дауысы естілуі тиіс екенін тағы бір мәрте көрсетті.
