Семей таңы – Ұлы Жеңістің 80 жылдығы қарсаңында Л.Н.Гумилев атындағы Еуразия ұлттық университетінде тарихи мәні терең, жүректі толқытатын тың жинақтың тұсауы кесілді. «Хат жаздым қалам алып қан майданнан» атты кітап соғыс даласынан жазылған жауынгерлік хаттардан құралған, деп хабарлайды Semeytany.kz тілшісі.
Белгісіз батырлар да ұмыт қалмаған
Жинаққа Кеңес Одағының Батырлары — Бауыржан Момышұлы, Мәлік Ғабдуллин, Әзілхан Нұршайықов, Әлия Молдағұлова сынды жауынгерлердің хаттарымен қатар, 130-ға жуық есімі белгісіз қазақ сарбазының майданнан жолдаған сағыныш пен үмітке толы жазбалары енген.
Бұл хаттар — Ұлттық ғылым академиясының Сирек кітаптар мен қолжазбалар қорынан алынған. Жинақта мемлекет басшысы Қасым-Жомарт Тоқаевтың да өз ағасы — майданнан оралмаған Қасым Тоқаев туралы жазған естелігі жарияланған.
Ғалымдар еңбегі – елдік іске қосылды
Кітапты жарыққа шығаруға университет ғалымдары белсене қатысқан. Академик Ерлан Сыдықовтың айтуынша, бұл бастама жалғасын табады. Ол:
«Соғыстың ащы шындығын сол кездің хаттары арқылы ғана терең сезінуге болады», – деп атап өтті.
Мақсат – үнсіз қалған ерлікті сөйлету
Жинақтың басты мақсаты – із-түзсіз кеткен, бірақ майданнан хат қалдырған сарбаздардың есімін ұмыт қалдырмай, тарихта қалдыру. Алдағы уақытта бұл бағытта тағы да бірқатар зерттеу жұмыстары жүргізіліп, арнайы сериялы кітаптар шығарылмақ.
Ерлан Айқынұлы
