Мәдениет
Semeytany.kz – Мемлекет басшысы Қасым-Жомарт Тоқаев шілденің алғашқы жексенбісінде атап өтілетін Ұлттық домбыра күнімен қазақстандықтарды құттықтады. Бұл туралы ол өзінің әлеуметтік желідегі парақшасында жазды.
– Домбыра – ұлт болмысы, халық қазынасы. «Қазақ – нағыз қазақ емес, нағыз қазақ – домбыра», – дей келе, Президент өскелең ұрпақтың ұлттық аспапқа деген құрметі мен қызығушылығына ерекше тоқталды. Оның айтуынша, жастардың төл мәдениетке бет бұруы – отансүйгіштіктің айқын көрінісі.
– Ата-бабаларымыздың мәдени мұрасын көздің қарашығындай сақтау – нағыз отаншылдық. Отанға сүйіспеншілік – мемлекеттілігіміздің темірқазығы. Қазақстан жастары осыны жақсы түсінеді әрі қолдайды. Бұл – мені қуантады, – деді Мемлекет басшысы.
Президент дәстүрлі өнер майталмандарына көрсетіліп жатқан құрметке де тоқталып, Қайрат Байбосыновтың «Қазақстанның Еңбек Ері», Айгүл Үлкенбаева мен Айгүл Қосанованың «Қазақстанның халық әртісі» атағына ие болғанын атап өтті.
– Қасиетті қара домбыраның күмбірін бүкіл әлемге паш етіп жүрген азаматтарға алғыс айтамын, – деп түйіндеді Қасым-Жомарт Тоқаев.
