Semeytany.kz – 9-11 шілде аралығында «Шығыс» өңірлік қолбасшылығына бағынысты әскери бөлімдер арасында үздік сержанттарды анықтауға арналған сайыс өтті. Үш күнге созылған бұл іріктеу кезеңіне Семей, Өскемен, Павлодар, Аягөз, Үшарал қалалары мен Жаңғызтөбе кентіндегі әскери бөлімдерден 100-ге жуық сержант қатысты.
Сайыс бірнеше кезеңнен тұрды: алғашқы турда қатысушылар белтемір мен қоссырықта тартылудан сынға түссе, кейін 1 және 10 шақырымға жүгіру арқылы өздерінің шыдамдылығы мен жылдамдығын көрсетті. Сонымен қатар, гір тасын көтеру арқылы күштік дайындықтары да бағаланды.
1 сыныпты сержант Азамат Ешенов бұл байқаудың әскери тәртіпті нығайтып, сержанттар арасындағы бәсекелестікті арттыруға зор үлес қосатынын атап өтті. Оның айтуынша, мұндай сайыстар дене дайындығын жетілдірумен қатар, әскери рухты көтеруге де септігін тигізеді.
Әр бөлімнен жеті сержанттан құралған командалар келіп қатысты. Олар: үздік бөлімше командирі, үздік рота сержанты, үздік взвод сержанты, үздік рота старшинасы, үздік рота технигі, үздік батальон сержанты және үздік бөлім сержанты аталымдары бойынша іріктелді.
Сайыс қорытындысы бойынша үздік танылған сержанттар ҚР Қарулы Күштері деңгейінде өтетін келесі кезеңге жолдама алды.
