Semeytany.kz – Облыс әкімі Берік Уәли Семей қаласындағы жол инфрақұрылымын аралау барысында Юность кентіндегі 14-тұйық көшеде жүргізіліп жатқан жөндеу жұмыстарымен танысты. Бұл көшеде асфальт жабындысы толық жаңартылуда.
Биыл қала бойынша жалпы ұзындығы 43 шақырымды құрайтын 52 көшеде орташа жөндеу жұмыстары жоспарланған. Оның 36-сы – бұрын-соңды асфальт төселмеген көшелер.
Қазіргі таңда «Гордорстрой» ЖШС 9 көшеде жөндеу жұмыстарын атқарып жатыр. Аталған компания директоры Бауыржан Қайрамбаевтың айтуынша, Юность кентіндегі 800 метрлік учаскеге 6 сантиметрлік бірінші қабат асфальт төселген, алдағы күндері екінші қабаты төселмек.
Аймақ басшысы жұмыс сапасына баса мән беріп, мердігерлерге белгіленген мерзімді сақтай отырып, жөндеу жұмыстарын уақытылы аяқтауды тапсырды. Сонымен қатар, келер жылы асфальтталмаған көшелердің санын екі есеге арттыру көзделіп отыр.
