Semeytany.kz – Облыс әкімі Берік Уәли таңғы 7-де Семей қаласындағы абаттандыру жұмыстарының барысын бақылап, тұрғындармен тілдесті.
«Аулаішілік аумақтарды ағымдағы жөндеу» бағдарламасы аясында биыл 22 ауланы жаңарту көзделген. Оның жартысы сол жағалауда, қалғаны оң жағалауда орналасқан. Бұдан бөлек, халық қатысатын бюджет аясында тағы 13 аула абаттандырылмақ. Жобада спорт және балалар ойын алаңдарын орнату қарастырылған.
Қазіргі таңда қаладағы 14 ауланың тұрғындары құрылыс барысын бақылап отыр. Аймақ басшысы Шығыс кентіндегі Аюченко көшесінде орналасқан үйдің ауласына барып, жергілікті жұртпен сөйлесті. Қала тұрғыны Людмила Олескина бұл аулаға соңғы 38 жылда жөндеу жүргізілмегенін айтып, балалар үшін жасалып жатқан жаңа мүмкіндіктерге ризашылығын білдірді.
Қостанай көшесіндегі бірнеше аулада да жөндеу жүріп жатыр. Тұрғындардың айтуынша, бұл аумаққа асфальт алғаш рет төселіп отыр. «40 жылдан астам уақыт бойы бұл аулаға ешқандай жөндеу жүргізілген емес. Қазір бес аулада жұмыс қызу жүріп жатыр. Бұл қамқорлық үшін алғысымыз шексіз», – деді Ділдә Еркенқызы.
Берік Уәли мердігерлерге жұмысты сапалы әрі мерзімінде аяқтауды тапсырды. Оның айтуынша, биыл 40 үйдің ауласында асфальт төселіп, келесі жылы 200 аула жаңғыртылады.
