Өткен аптада өңірімізге Сенат жанындағы Сарапшылар клубының мүшелері мен «Талдау мектебі» жобасының түлектері келіп, Семей қаласының белсенді жастарымен, жас мемлекеттік қызметшілермен және оқытушылармен кездесті.
Гүлім ЗАМАНБЕКҚЫЗЫ,
«Semey tany»
Кездесу барысында спикерлер қоғамның әр саласы бойынша маңызды аспектілерге тоқталып, қатысушыларға мазмұнды ақпарат берді. Сонымен қатар мемлекеттік мемлекеттік басқарудағы сараптаманың маңызы, Сенаттың қоғамдық жобалары, қаржылық сауаттылықты арттыру, жасанды интеллектімен тиімді жұмыс істеу әдістері, сондай-ақ табысты маман болып қалыптасу жолдары секілді мәселелер талқыланды.
Жиында мемлекеттік басқару, БАҚ және азаматтық сектордағы аналитикалық тәсілдерді күшейтуге бағытталған «Талдау мектебінің» жобасы таныстырылды. «Талдау мектебі» қоғамдық жобасы мемлекеттік қызметте, бизнесте, халықаралық ұйымдарда және басқа да салаларда жұмыс істейтін жас мамандардың талдамалық дағдыларын жетілдіруге ықпал етеді. Бұл жобаға кез келген адам байқау арқылы қатыса алады.
Жиында сондай-ақ жас сарапшылар клубының жұмысы таныстырылып, бастамалары туралы айтылды. Сенат төрағасы хатшылығы меңгерушісінің орынбасары Жасұланбек Майлыбай клубтың заң жобаларын әзірлеуге қатысатынын айтып, қолға алынған жобалар туралы баяндады.
– Абай атамыздың 180 жылдығы – ұлттық деңгейдегі айтулы мереке. Біз осы тарихи сәтке өз үлесімізді қосқымыз келді. Қазіргі таңда жас мамандардың бойында аналитикалық қабілеттің болуы аса маңызды. Бұл – заман талабы.. Осы орайда бағыт-бағдар беріп, көмектесу үшін біз де өңірлерге шығып, жастарға дәрістер өткізудеміз, – деді Жасұланбек Майлыбай.
Кездесуде спикер ретінде Семей қаласының тумасы – халықаралық қатынастар саласының тәжірибелі сарапшысы Искандер Ақылбаев сөз сөйледі. Ол қазіргі жастардың алдында тұрған мүмкіндіктер мен сын-қатерлерге тоқталып, табысты болу үшін қандай қасиеттер керек екенін айтты.
— Біріншісі – төзімділік пен ішкі рух, кез келген қиындыққа төтеп бере алу, сын сттерде мойымай, тек қана алға ұмтылумаңызды. Екіншісі — білімге құштарлық. Жастар үнемі жаңа білім мен дағдыларды меңгеруге талпынуы қажет. Бүгінгі күннің басты талабы – өзін-өзі дамыту. Үшіншісі – жарқын болашаққа деген сенім. Өйткені өмірлік және ксіби жолда түрлі кедергілер кездесуі мүмкін. Бұл — өсу мен қалыптасудың бір бөлігі. Үлкен жетістіктерге жеткен тұлғалардың барлығы дерлік жеңіс жолында жеңілістер болатынын жақсы білген,- деді сарапшы.
Облыстық Жастар ресурстық орталығының директоры Айдос Төлеуханов бұл кездесудің жастар үшін маңызы жоғары екенін айтады.
— Абайдың 180 жылдық мерейтойына орай Сенат жанындағы Сарапшылар клубының мүшелері мен «Талдау мектебінің» түлектері түрлі сала өкілдеріне дәріс өткізу үшін келген екен. Киелі Қарауыл мекеніне де барады. Астана қаласынан арнайы келген сарапшылар — өз саласының үздіктері шетелдік тәжірибемен бөлісіп, дәріс өткізді. Бұл – жастар үшін үлкен мүмкіндік. Бүгінгі кездесуде қозғалған тақырыптар жастарға да, барлық сала мамандарына қызықты деп ойлаймын. Мұндай бастамаларды біз өңірлік деңгейде жалғастыратын боламыз. Бүгінгі дәріске қатысқан жастарымыз алған білімдерін өзгелермен бөлісетін болады, – деді ол.
Жиынға қатысқан жас мамандар сұрақтарын қойып, нақты жауаптар алды.
