Абай облысының әкімі Берік Уәли педагогтардың тамыз конференциясына қатысып, өңірдегі білім саласының дамуына қатысты баяндама жасады. Баяндамада облыс әкімі Президенттің білім сапасын арттыру және мектеп инфрақұрылымын жаңарту жөніндегі тапсырмалары бойынша өңірде атқарылып жатқан жұмыстарға кеңінен тоқталды.
Сәтжан қасымжанұлы
«Semeı tańy»
Облыс әкімі Берік Уәли тамыз конференциясында білім саласы бойынша қол жеткен табыстарды атап өтті. Бүгінгі күнде әрбір оқушының сапалы білім алып, жан-жақты дамуына қолайлы жағдай жасау мақсатында игі қадамдар жасалып келеді. Облыс орталығындағы екі мектепке 1000 орындық қосымша құрылыс салынады. Облыстағы 3 апатты мектептің мәселесі шешімін тапты. Барлық мектеп заманауи жиһаздармен және оқу құрал-жабдықтарымен жабдықталып, әрбір оқу кабинеті үшін қажетті техникалық құралдар жиынтығы қамтамасыз етіледі. Бұның барлығы ұстаздардың жұмысын жеңілдетіп, оқушылардың білім сапасын көтеруге мүмкіндік береді.
Балалардың бос уақытын тиімді пайдаланып, өнер мен білімге үйрету мақсатында қосымша білім беру нысандары да салынып жатыр. Атап айтқанда, облыс орталығында оқушылар сарайының есігі айқара ашылатын күн алыс емес. Абай ауданы Кеңгірбай би ауылындағы Қарашоқы шатқалында балалар лагерінің құрылысы қарқын алды.
Сапалы істің басында сапалы кадр мәселесі тұрады. Мемлекет басшысының «Ұстаз қандай болса, мемлекет сондай болады» деген сөзіне орай мемлекет тарапынан ұстаздарды қолдауға ерекше мән беріліп келеді. Сол тұрғыда кадр мәселесінде атап айтуға лайықты оң өзгерістер бар. «Білім беру өзгерістерінің 1000 көшбасшы» жобасы аясында 26 үміткер сертификат алып, оның 20-сы қызметке тағайындалуы соның айғағы.
Сонымен қатар ерекше білім беру қажеттіліктері бар балаларды оқыту және тәрбиелеу үшін жағдай жасауға үнемі жете мән беріліп отырады. Облыста 2024 жылы басталған «Мейірім» қайырымдылық акциясы да оң нәтиже беріп отыр. 200-ден астам мекеме ұжымы акция аясында 222 жетім балаға патронаттық қолдау көрсетіп, 161 баланың есеп шотына 45 млн.теңгеден астам қаражат аударылды.
Өңір басшысы қазақ руханиятының алтын діңгегі – хакім Абай Құнанбайұлының 180 жылдық мерейтойы жоғары деңгейде үлкен жауапкершілікпен атап өтілгеніне де тоқталды.
«Біз бұл мерейтойды салтанатпен емес, сабақтастықпен, сырлы мазмұнмен, жас ұрпақтың санасына сәуле құятын рухани тереңдікпен атап өтуді мақсат еттік. Өткізілген іс-шаралар – жас ұрпаққа Абайды танытудың, Абайша ойлаудың, Абайша толғанудың жарқын мысалына айналды. Себебі Абай – өткеннің ғана емес, бүгін мен болашақтың да шамшырағы, ұлт санасының жаңғыруына серпін беретін тарихи тұлға. Оның сөзі – мәңгілік, ойы – өрелі» деді. Б. Уәли.
Конференция соңында облыс әкімі алдағы оқу жылындабұдан да зор абырой биігінен көрініп, білім ьеру саласының өркендеуі үшін аянбай еңбек етулеріне тілектестігін білдірді.
