Semeytany.kz — 21 тамызда Семей қаласындағы аспалы көпірдің пилонына белгісіз ер адам көтеріліп, оқиға орнына ТЖМ, полиция, жедел жәрдем және жергілікті атқарушы органдар жұмылдырылды. Құтқарушылар ер адаммен байланыс орнатып, түн ішінде оны қауіпсіз жерге түсіріп, полиция бөліміне жеткізді.
Оқиға кезінде келіссөзді Оперативті-құтқару жасағының бөлімше бастығы, құтқарушы Ринат Бабаджанов жүргізді. Әлеуметтік желіде жарияланған видеоларда ер адамның суши мен пицца сұратқаны айтылды. Кейінірек оның әкімшілік жауапкершілікке тартылғаны хабарланды.
Айта кетейік, Семейдегі аспалы көпір 2000 жылдың 17 қазанында пайдалануға берілген. Нысанның биіктігі – 90 метр, ені – 35 метр, ұзындығы – 750 метр. Пайдалану мерзімі 200 жылға есептелген.
Қазіргі уақытта жағдай тұрақты. Оқиға бойынша тиісті органдар тексеру жүргізді, қосымша ақпарат болған жағдайда хабарланады.
