Semeytany.kz — Абай облысының әкімі Берік Уәли Бесқарағай ауданында асыл тұқымды жылқы шаруашылығын дамытып жүрген кәсіпкермен және ғалымдармен кездесіп, жергілікті селекциялық жобаға қолдау білдірді. Кездесуге «Мукинов» шаруа қожалығының басшысы Хабидолла Мукинов, ауыл шаруашылығы ғылымдарының өкілдері Қайрат Исхан мен Амин Акимбеков қатысты.
Жиында өңірдегі жылқы шаруашылығын ғылыми негізде дамытудың маңызы айтылды. 2022 жылдан бері «Мукинов» қожалығы базасында Шәкәрім университеті мен Қазақ ұлттық аграрлық зерттеу университетінің мамандары «Бесқарағай» жылқы типін жетілдіру бойынша бірлескен селекциялық жұмыстар жүргізіп келеді. Нәтижесінде «Шойынқара» және «Байторы» атты жаңа типтер ресми түрде танылып, патенттелген.
Қожалықта тұқымды толық қалыптастыру үшін қосымша екі аталық із – «ҚанКүрең» және «Тобылғы жирен» бағыттары әзірленіп жатыр. Жоба аяқталған соң «Бесқарағай» жылқысы дербес тұқым ретінде мемлекеттік тізілімге енгізілуі көзделген.
Берік Уәли бұл бастаманы облыстың ғана емес, елдің жылқы шаруашылығы үшін маңызды қадам деп бағалап, ғалымдар мен шаруалардың еңбегіне ризашылығын білдірді. Аймақ басшысы жобаны әрі қарай да жүйелі қолдау көрсетілетінін айтты.
