Semeytany.kz — Абай облысының әкімі Берік Уәлидің төрағалығымен өңірлік инвестициялық штабтың тұңғыш отырысы өтті. Жиынға инвесторлар, кәсіпкерлер және мемлекеттік органдардың өкілдері қатысып, өңірге капитал тартудың тетіктері талқыланды.
Кеңесте «Eurasia Agro Semey» ЖШС, «PANA Complex Semey» ЖШС және «Yqylas Invest» ЖШС бастамаларының жүзеге асу барысы қаралды. Кәсіпкерлік және индустриялық-инновациялық даму басқармасының дерегінше, өңірлік жобалар пулында жалпы құны 3,2 трлн теңгеден асатын 86 жоба бар. Олар агроөнеркәсіп, қайта өңдеу, индустриялық және әлеуметтік инфрақұрылым бағыттарын қамтып, 14 мыңнан астам жаңа жұмыс орнын ашуды көздейді.
Аймақ басшысы аудан-қала әкімдеріне инвестиция тарту ісін жандандыруды тапсырды. Оның айтуынша, штаб отырыстары ай сайын өтеді, ал әрбір инвестициялық бастама өңір экономикасының өсуіне, жаңа жұмыс орындарының құрылуына және бизнес ортаның жақсаруына қызмет етуі тиіс. Әкімдік заңнама аясында инвесторларға қажетті қолдауды көрсетуге дайын екенін мәлімдеді.
Кілт сөздер: Абай облысы, инвестициялық штаб, Берік Уәли, инвестиция тарту, жобалар пулы
