ҚР ҰҚК Шекара қызметі Абай облысы бойынша департаментінде әскери борыш пен ел алдындағы жауапкершілікпен қатар, рухани құндылықтар да басты назарда. Соның айғағы ретінде «Мейірімділік» акциясы аясында шекарашы сарбаздар игі іс-шара өткізді.
Әскери қызметшілер денсаулығына байланысты өмірден өткен осы департаменттің бұрынғы шекарашысының отбасына арнайы барып қайтты. Олар марқұмның отбасына көңіл айтып, әрдайым жан-жақты қолдау көрсету – ұжымдық борыш екенін жеткізді.
1 қыркүйек – Білім күні қарсаңында шекарашылар мектепке баратын балаларға қуаныш сыйлап, жаңа оқу жылына қажетті мектеп сөмкелері, кеңсе тауарлары мен оқу-құралдарын тарту етті. Бұл игі қадам балалардың жүрегіне қуаныш ұялатты әрі олардың жаңа оқу жылына сенімді қадам басуына себеп болды.
Шекара қызметінің жеке құрамы тек мемлекеттік шекараны күзетумен шектелмей, қоғам алдындағы әлеуметтік жауапкершілікті де терең сезінеді. Халықпен бірге болу, көмекке мұқтаж жандарға қол ұшын созу – олардың кәсіби және адами парызы.
«Мейірімділік» акциясы – бірлік пен жанашырлықтың, ізгілік пен адамгершіліктің айқын көрінісі. Осындай шаралар арқылы шекарашылар ел ішінде де үлгі болып, қоғамға рухани тірек болып келеді.
