Semeytany.kz — Қаржылық мониторинг агенттігі (ҚМА) заңсыз онлайн-ойындарды жарнамалауға отандық контент жасаушылардың қатысы барын мәлімдеп, блогерлерді заңды қатаң сақтауға шақырды. Ведомство дерегінше, жыл басынан бері 34 блогердің мұндай жарнамаға қатысы анықталған. ҚР ҚМА Баспасөз қызметі хабарлады.
Соңғы екі жарым жылда ел ішінде 205 жасырын казино жабылып, 224 адам қылмыстық жауапкершілікке тартылған. Агенттік заңсыз гемблингтің негізгі қаупі шетелде тіркелген онлайн-казиноларда екенін атап өтті. Олар «айна» сілтемелер арқылы қолжетімді болып, қазақстандықтарды құмар ойынға тартады. Биыл 34 шетелдік платформаға қатысты 17 мыңнан астам сілтеме бұғатталған.
ҚМА «Ойын бизнесі туралы» заңға сай онлайн-казинолардың қызметі Қазақстанда толық тыйым салынғанын ескертеді. Ведомство қазақстандық төлем ұйымдарының кейбірі депозит енгізу мен «кэшаутты» қамтамасыз етіп отырғанын, бұл «қаржылық делдалдарға» құқықтық баға берілетінін айтты. Онлайн-казинолардың верификациясыздығы мен төмен ставкалары тәуелділік қаупін күшейтіп, ұрпақ денсаулығына да, қоғамға да зиян тигізеді. ҚМА мұндай қызметтің қылмыстық табыстарды заңдастырумен байланысатынын да атап өтті.
Жаңа «клиенттерді» тарту үшін иелері көп жазылушысы бар блогерлерді пайдаланады. Агенттік биыл 34 отандық контент жасаушыға қатысты материал жинаған: олардың 11-і әкімшілік жауапкершілікке тартылған, 23-і бойынша құжаттар Мәдениет министрлігіне жолданды. ҚМА мәліметінше, кейбірі заңды жүйелі түрде бұзған: мысалы, «Baller» лақапатымен танылған Шыңғысхан Көпбаев жыл басынан бері осы бап бойынша бес рет жауапқа тартылған. Ринат Шамшыраққа қатысты да әкімшілік іс қозғалған. «Niko_nett», Қайсар Қамза, Наиль Тұрғанов (онлайн-казино жарнамасы үшін 8 млн теңгеден астам алғаны айтылды), Нұрғазы Тоқтаров («Nakonay Qarapaiym», жарнама үшін 15,8 млн теңге алып, оның едәуір бөлігін ойында ұтылғаны көрсетілді), сондай-ақ Мариям Құлжабаева («@oomariko», тіркелуге шақырған стористерін 350 мың теңгеге бағалағаны айтылды) және басқа да есімдер аталды. Ведомство блогерлер айыппұл төлеп, жарнаманы жалғастырып жүргеніне алаңдаулы.
Қазіргі жағдайда ҚМА мұндай әрекеттерді ҚР ҚК-нің 28-бабы 5-тармағы шеңберінде — заңсыз ойын бизнесіне көмектесу ретінде қарастыру ниетін жариялады. Сонымен бірге, қаржы пирамидаларын жарнамалауға ұқсас, онлайн-казино жарнамасы үшін де қылмыстық жауапкершілікті енгізу бастамасы көтерілді. Агенттік блогерлерге заңды сақтауды, заңсыз ойындарды насихаттаудан бас тартуды және күмәнді ұсыныстар туралы «АФМ Insider» телеграм-ботына хабарлауды ұсынды; анонимдік кепілдендіріледі.
