Тамыздың 29-ы күні «Невада-Семей» халықаралық антиядролық қозғалысының белсенділері, жергілікті атқарушы орган өкілдері, қоғам қайраткерлері мен қала тұрғындары «Өлімнен де күшті» монументіне гүл шоқтарын қойып, ядролық сынақ құрбандарын бір минут үнсіздікпен еске алды.
Шараға Абай облысы әкімінің орынбасары Мейірлан Раханов, Семей қаласы әкімінің орынбасары Қуаныш Әбілдаев қатысты. Бейбітшілік пен саяси тұрақтылықты сақтауды нақты ұстаным еткен еліміз үшін бұл күннің қаншалықты маңызды екендігі баршамызға мәлім.
Семей ядролық сынақ полигоны осыдан 34 жыл бұрын, 1991 жылы 29 тамызда жабылғаны тарихтан белгілі. Осылайша Қазақстан әлемде алғашқылардың бірі болып ядролық қарудан бас тартқан ел болды.
