Semeytany.kz — «Бүкілқазақстандық ағаш отырғызу күні» аясында Семейдегі Бейбітшілік аралында жаңа орман тұқымбағы өз жұмысын бастады. Ашылу рәсіміне облыс әкімі Берік Уәли, «Семей орманы» мемлекеттік табиғи резерватының қызметкерлері, сала ардагерлері және белсенді жастар қатысты.
Нысанның жалпы аумағы 100 гектар. Құрылысты 2026 жылдың желтоқсанында аяқтау жоспарланған. Тұқымбақ аумағында қылқан жапырақты және жапырақты ағаштардың егістік алаңы, жабық тамыр жүйесіне арналған контейнерлік жылыжай аймағы, шеберханалар, қоймалар, кеңселер салынады. Сонымен қатар 3 гектарда инженерлік желілер мен қосалқы алаңдар орналасады, ал 5 гектар жер аналық плантациялар мен тұқым бауына арналады.
Биыл облыста 65 мыңнан астам ағаш көшеті отырғызылды. «Семей орманы» аумағындағы өрт салдарын жою мақсатында жыл сайын 20 миллионнан астам қарағай егіледі. Жаңа тұқымбақ өңірді көгалдандыруға сапалы отырғызу материалын ұсынуға, экологиялық тепе-теңдікті сақтауға және Семейдің сол жағалауы бойында жасыл белдеу құруға мүмкіндік береді.
Аймақ басшысы Берік Уәли бұл бастама өңірдің экологиялық жағдайын жақсартуға және орман қорын қалпына келтіруге бағытталғанын атап өтті. Оның айтуынша, тұқымбақ Ертіс өзенінің жағасында орналасқандықтан, көшеттерді көбейтуге қолайлы жағдай жасайды.
Сала ардагерлері де жобаның маңызын ерекше атады. «Бүгін немерелерімді ертіп келдім. Тұқымбағымыз көркейіп, ағаштары жайқалып өсе берсін. Бұл Семей үшін өте қажетті жоба. Осы тұқымбақ арқылы ағаштарды сатып алмай-ақ, өзіміз өсіре аламыз», – деді Құрмет Мұхамадиев.
Ашылу рәсімінен кейін аймақ басшысы орманшылармен және жастармен бірге көшет отырғызуға қатысты. Шара барысында тұқымбақ аумағына он мыңға жуық қылқан жапырақты және жапырақты ағаш егілді.
«Таза Қазақстан» экологиялық бағдарламасы аясында өңірде жүйелі жұмыстар жүргізілуде: Абай облысында 44 іс-шарадан тұратын өңірлік жоспар бекітілген. 2022–2024 жылдары облыс аумағында 213 мыңнан астам ағаш отырғызылды. Семейде алғаш рет 75 мың ағашты толық түгендеуді қамтитын дендрологиялық жоспар әзірленді.
