Semeytany.kz – Қазақстан Республикасы Қаржы министрлігінің бастамасымен өткен республикалық «Халықтық бухгалтер» акциясы өз жұмысын аяқтады. Алты айға жуық уақытқа созылған жоба аясында тұрғындар мен кәсіпкерлер бухгалтерлік есеп, салық заңнамасы және электрондық мемлекеттік қызметтерге қатысты тегін кеңес алу мүмкіндігіне ие болды.
Абай облысында акция барысында кәсіби бухгалтерлер мен Мемлекеттік кірістер органдарының тәжірибелі мамандары азаматтарды қабылдады. Нәтижесінде 3945 тұрғын мен кәсіпкерге консультациялық көмек көрсетілді. Жалпы саны 8,5 мыңға жуық сұрақ қаралып, әрқайсысына түсіндіру жұмыстары жүргізілді.
Кеңес алу барысында азаматтар салық салу тәртібі, арнаулы салық режимдері, салық міндеттемелерін орындау, электрондық сервистерді пайдалану және басқа да өзекті мәселелер бойынша жауап алды.
Абай облысы бойынша Мемлекеттік кірістер департаментінің басшысы Руслан Данияровтың айтуынша, акция халық пен мемлекеттік органдар арасындағы ашық байланысты нығайтуға ықпал етті.
Оның сөзінше, жобаның негізгі мақсаты тек кеңес беру емес, тұрғындардың салықтық сауаттылығын арттыру болды. Қатысушылардың белсенділігі мұндай форматтың халыққа қажет екенін көрсетті.
Департамент өкілдері акция аяқталғанымен, ақпараттық-түсіндіру жұмыстары жалғасатынын мәлімдеді. Алдағы уақытта да семинарлар, ашық есік күндері, көшпелі қабылдаулар және халықтың салық мәдениетін арттыруға бағытталған өзге де іс-шаралар ұйымдастырылатын болады.
Сондай-ақ ведомствода салық төлеушілерге қолжетімді кеңес беру, ашықтықты қамтамасыз ету және азаматтарды уақтылы ақпараттандыру алдағы уақытта да негізгі басымдықтардың бірі болып қала беретіні атап өтілді.
