Өңдеуші өнеркәсіпті дамыту, мемлекеттік сатып алу жүйесін жетілдіру, ішкі нарықты қорғау және отандық өндірушілерді қолдау мәселелері «Әділет» партиясы Іскерлік кеңесінің кезекті отырысында талқыланды.
Жиын партия төрағасы Айбек Дәдебайдың жетекшілігімен өтті. Оған бизнес өкілдері, салалық қауымдастықтар мен мемлекеттік органдардың өкілдері қатысып, қазақстандық өндірісті дамытуға бағытталған жүйелі өзгерістер жөнінде ұсыныстарын ортаға салды.
Отырыста сөз сөйлеген Айбек Дәдебай жаңа Конституцияның күшіне енуімен ел дамуының жаңа кезеңі басталғанын атап өтті. Оның айтуынша, Ата Заңда белгіленген қағидаттар жаңа өндіріс орындарын ашу, жұмыс орындарын көбейту және отандық кәсіпкерлікті қолдау арқылы нақты іске асуы қажет.
Соңғы он жылда өңдеуші өнеркәсіп өндірісінің көлемі шамамен 50 пайызға өсіп, жалпы ішкі өнімдегі үлесі 10,2 пайыздан 13 пайызға дейін артқан. Алдағы кезеңде қосылған құны жоғары өнім шығаратын өндірістерді дамыту негізгі міндеттердің бірі ретінде белгіленді.
Жиында мемлекеттік сатып алу жүйесін жетілдіру мәселесіне де ерекше назар аударылды. Қатысушылардың пікірінше, бұл жүйе тек сатып алу құралы емес, отандық өндірісті дамыту тетігіне айналуы тиіс.
«Универсал» компаниясының басшысы Замира Кузиева жеткізушілерді бағалау кезінде олардың өнімінің шығу тегінен бөлек, Қазақстан экономикасына қосқан үлесін де ескеру қажет екенін айтты.
Өз кезегінде «Каустик» АҚ-ның бас директоры Ермек Тоқмағамбетов локализация деңгейі жоғары кәсіпорындарды мемлекет тарапынан басымдықпен қолдау қажеттігін жеткізді. Оның айтуынша, кәсіпорын өнімінің 95 пайыздан астамы жергілікті шикізаттан өндіріледі, ал өндірісті дамытуға салынған инвестиция көлемі 100 миллион АҚШ долларынан асады.
Кездесуде ішкі нарықты қорғау мәселесі де көтерілді. Қазақстандағы цемент және бетон өндірушілер қауымдастығы ұлттық стандарттарды жаңарту сапасыз цемент импортының көлемін азайтуға мүмкіндік бергенін мәлімдеді.
Ал «Адал Тауар» қауымдастығының төрағасы Гүлмира Уахитова өткен жылы елімізде 205 мыңнан астам контрафактілік өнім анықталып, заңсыз айналымнан 8,6 миллион қорап темекі тәркіленгенін айтты. Оның пікірінше, заң талаптарын сақтайтын кәсіпкерлер заңсыз жұмыс істейтіндермен бәсекелесуге мәжбүр болып отыр.
Жиын қорытындысында айтылған барлық ұсыныстар Қазақстанның өнеркәсіптік саясатының Ақ кітабына (White Paper) енгізілетіні хабарланды. Құжатта бизнес өкілдерінің бастамалары, сарапшылардың ұсыныстары және оларды кезең-кезеңімен жүзеге асыру жоспары қамтылады.
