Абай облыстық мәслихатының төрағасы Шалқар Байбеков Астанада өткен Конституциялық реформа жөніндегі комиссия жұмысына бірнеше күн қатысқанын айтып, комиссия отырыстарында елдің болашағына тікелей әсер ететін маңызды шешімдер талқыланғанын жеткізді. Оның пікірінше, бұл отырыстарда Қазақстанның жаңа Конституциясының алғашқы жобасы қаралып, соңғы алты ай бойы жүргізілген талқылаулар мен ұсыныстар жүйеленген нақты нәтижеге айналған.
Байбековтің айтуынша, ұсынылып отырған өзгерістер кездейсоқ қабылданып отырған жоқ. Соңғы жылдары қоғам тарапынан биліктің ашықтығына, шешім қабылдаудың жеделдігіне және жауапкершілігіне нақты сұраныс күшейген. Осы қоғамдық талапты ескере отырып, Мемлекет басшысының бастамасымен Конституцияны кешенді жаңарту қолға алынған. Ал Конституциялық реформа жөніндегі комиссия жұмысының негізгі мәні де – осы жаңартудың мазмұнын пысықтап, бірізге түсіру.
Төраға сөзінде жаңа жобада Конституцияға өзгерістер мен толықтырулар енгізілгенін атап өтеді. Жаңа редакцияға сәйкес, Конституция 11 бөлімнен және 95 баптан тұрады. Сонымен қатар, екі жаңа бөлім енгізіліп, бірнеше бөлімнің атауы өзгереді. Бұл өзгерістердің барлығы құжаттың құрылымына да, мазмұндық бағытына да елеулі жаңалық әкелетінін аңғартады.
Шалқар Байбеков Конституция жобасының дайындалу процесіне де тоқталады. Оның айтуынша, жаңа жоба азаматтардан, саяси партиялардан, қоғамдық ұйымдар мен сарапшылардан түскен 2 мыңнан астам ұсыныстың негізінде әзірленген. Бұл – қоғамның әртүрлі өкілі мен көзқарасын қамтыған кең ауқымды талқылаудың нәтижесі. Төрағаның бағалауынша, мұндай көлемдегі жұмыс ел тарихындағы ең ірі конституциялық жаңғыртулардың біріне айналып отыр.
Сондай-ақ ол түпкі шешімнің жалпыхалықтық референдум арқылы қабылданатынын ерекше атап өтеді. Байбековтің пайымынша, дәл осы тетік ұсынылып отырған өзгерістердің заңдылығы мен ашықтығын қамтамасыз етіп, қабылданатын шешімнің халық еркіне сүйенуіне мүмкіндік береді.
Осылайша, Шалқар Байбеков Конституция жобасын тек құқықтық құжат қана емес, қоғам сұранысына жауап беретін және елдің басқару жүйесіндегі ашықтық пен жауапкершілікті күшейтуге бағытталған маңызды бастама ретінде бағалайды.
