Шәкәрім университетінің ректоры – басқарма төрағасы Думан Орынбеков Қазақстан Республикасының жаңа Конституциясының жобасы жарияланғанын атап өтіп, құжаттағы басты бағыттардың бірі ретінде білім, ғылым, технологиялар мен инновациялардың тұрақты дамудың негізі болып көрсетілгеніне назар аударды. Оның айтуынша, бұл қағида қағаз жүзіндегі ұран ғана емес, өңірлердің әлеуетін күшейтетін нақты мүмкіндіктерді алға шығарады.
Ректор ұсынған пайымға сүйенсек, жаңа жобада өңірлер үшін бірнеше бағыт айқын көрінеді. Соның ішінде ғылыми-техникалық кластерлерді дамыту — аймақтың өндірістік және зияткерлік қуатын бір арнаға тоғыстыратын маңызды қадам ретінде қарастырылады. Сонымен бірге, өнеркәсіп, агроөнеркәсіп кешені, экология және цифрландыру салаларына арналған қолданбалы зерттеулерді күшейту арқылы ғылымды өмірдің нақты сұранысына жақындату мүмкіндігі пайда болады.
Думан Орынбеков кадр даярлау мәселесін де бөле-жара айтты. Оның пікірінше, аймақ экономикасына қажетті мамандарды жүйелі түрде даярлау — өңірдің өз аяғынан нық тұруына, еңбек нарығындағы теңгерімді сақтауға ықпал ететін негізгі факторлардың бірі.
Тағы бір маңызды ой — университеттердің рөліне қатысты. Ректордың сөзінше, жоғары оқу орындарын технология мен сараптаманы тарату алаңы ретінде пайдалану өңірлерге тек білім берумен шектелмей, нақты өндіріс пен қоғамға пайдалы шешімдер ұсынуға жол ашады.
Осы тұста ол референдумның мәнін де айқындап өтті: референдум — бұл дамудың нақты моделін таңдау. Яғни, таңдау тек саяси қадам емес, елдің қай бағытта өсіп-өркендейтінін айқындайтын шешім.
Сөз соңында Шәкәрім университеті аталған бағыттар бойынша белсенді жұмыс істеуге дайын екенін білдірді.
