Облыстық әйелдер істері жөніндегі комиссияның мүшесі Айнагүл Нұртазина Қазақстанда белсенді талқыланып жатқан конституциялық реформаның елдегі басты оқиғаға айналуы мүмкін екенін айтады. Оның пікірінше, қоғамда көптеген өзгерістерге деген сұраныс бұрыннан бар және бұл үдеріс Мемлекет басшысының бастамасымен жүзеге аспақ.
Нұртазина кейбір азаматтардың «Конституцияға неге өзгеріс керек, бәрі түсінікті еді, жақында ғана түзетулер енгізілді ғой» деген сауал қоятынын атап өтеді. Бірақ оның ойынша, адамдарды алаңдататын күнделікті мәселелер — отбасындағы жағдайлар, сот процестері, діни көріністер, білім беру және өзге де көптеген салалардағы түйткілдер — өз шешімін тауып, жоғары заңнамалық деңгейде нақты бекітілуі тиіс.
Сондай-ақ ол негізгі тұжырымдары 30 жылдан астам уақыт бұрын қабылданған құжаттың өзі жаңартуды және өзектендіруді қажет ететінін алға тартады. Осы тұрғыда конституциялық комиссия Қазақстанның жаңа Конституциясының алғашқы жобасын дайындағанын жеткізеді.
Айнагүл Нұртазина жобаның мазмұнына тоқталып, Негізгі заңның преамбуласында Қазақстан Республикасы зайырлы, құқықтық және әлеуметтік мемлекет екені, ал ең жоғары құндылықтары — адам, оның өмірі, құқықтары мен бостандықтары екені атап өтілетінін айтады. Сонымен бірге Егемендік пен Тәуелсіздік, аумақтық тұтастық және Республиканың басқару формасы өзгермейтін құндылықтар қатарына жатқызылатыны көрсетіледі. Ол биліктің жалғыз көзі әрі егесі Қазақстан халқы екені туралы норма да нақты бекітілетінін атап өтеді.
Нұртазинаның сөзінше, отбасы мен балаларды қорғау күшейтіледі: ер адам мен әйел арасындағы некеге еріктілік қағидаты және басқа да тұжырымдар нақтыланады.
Саяси құрылымдағы басты өзгерістер ретінде ол бірнеше жаңалықты атайды: Вице-Президент лауазымы енгізіледі, екі палаталы Парламент бір палаталы Құрылтайға айналады, ал құрылатын тұрақты Халық Кеңесіне елдің барлық өңірлері мен барлық этностарының өкілдері — депутаттар, қоғам қайраткерлері, ҮЕҰ өкілдері және басқалары кіреді. Оның пайымынша, бұл тетіктер заң жобаларын әзірлеу мен қабылдауды айтарлықтай жеделдетіп, бастамалардың бір бөлігі Халық Кеңесі өкілдерінен де шығатын болады.
Пікір иесі жаңа Конституция жобасы әлі барлық деңгейде кеңінен талқыланатынын, ал оны қабылдау тек жалпы халықтық референдум арқылы мүмкін болатынын түйіндейді.
