Alikhan Bokeikhan University тәрбие жұмысы және әлеуметтік мәселелер жөніндегі проректоры Айрат Базенов Қазақстан Республикасының жаңа Конституциясының мәтіні жарияланғанын айтып, ұсынылып отырған құжаттың тарихи әрі стратегиялық мәніне тоқталды.
Оның пайымынша, егемендіктің алғашқы жылдарында қабылданған Конституция мемлекет іргетасын қалауға қызмет етсе, бүгінгі жаңа Ата Заң жаһандану мен цифрлану дәуіріндегі тұрақты дамуды қамтамасыз етуге бағытталған.
Проректор жаңа Конституцияның негізгі мақсаты ретінде азаматтардың құқықтары мен бостандықтарын ғана емес, олардың жауапкершілігін де айқындап, қоғам өміріндегі тепе-теңдік мәдениетін қалыптастыру қажеттігін атап өтеді. Оның сөзіне сүйенсек, құжат билік тармақтары арасындағы тепе-теңдік пен тежемелік қағидаттарына негізделген басқару моделін орнықтырып, адамның еркін дамуына жағдай жасауға, қоғам мен мемлекет арасындағы сенімді нығайтуға тиіс.
Айрат Базенов Конституцияны тек құқықтық құжат ретінде қарастыру жеткіліксіз екенін айтады. Ол Конституцияны мемлекет пен қоғам арасындағы өзара жауапкершілікке сүйенген қоғамдық шарт ретінде бағалайды. Сондықтан әрбір азамат бұл үдерістен шет қалмай, өз пікірін білдіруі — демократиялық қоғамның маңызды белгісі екенін алға тартады.
Сондай-ақ ол 2019 жылдан бері жүзеге асырылып келе жатқан саяси және экономикалық реформалардың бағытына назар аударып, бұл өзгерістер суперпрезиденттік басқару үлгісінен әділеттілік пен демократиялық қағидаттарға сүйенген билік жүйесіне кезең-кезеңімен өтуді көздейтінін атап өтті. Оның ойынша, бұл үрдіс тек ішкі қоғамдық сұраныстың нәтижесі ғана емес.
Проректор Қазақстанды жаһандық өркениеттің бір бөлігі ретінде қарастырып, ел әлемдік даму логикасына сай келетін заманауи саяси жүйе қалыптастыруы керек деген тұжырым айтады. Осы тұрғыдан алғанда, Айрат Базенов жаңа Конституция еліміздің ұзақ мерзімді дамуына берік құқықтық негіз болады деген сенім білдірді.
