Шәкәрім университеті құрылымындағы әлеуметтік қолдау және жастарды дамыту орталығының жетекшісі Оразғалиева Арайлым жаңа Конституция жобасына қатысты пікірін «Жаңа құжат – жаңа көзқарас – жаңа бетбұрыс!» деген тұжырыммен бастады. Оның пайымынша, Конституциялық комиссия әзірлеген жаңа Конституция жобасы елдегі саяси-құқықтық жаңғырудың логикалық жалғасы болып отыр.
Оразғалиева құжатты әзірлеу барысында азаматтар, қоғамдық ұйымдар, саяси партиялар мен сарапшылардың ұсыныстарының ескерілуін маңызды көрсеткіш ретінде бағалайды. Бұл, оның пікірінше, мемлекеттің «Халық үніне құлақ асатын мемлекет» қағидатын институционалдық деңгейде бекітіп отырғанын аңғартады. Яғни, өзгерістерді қалыптастыру үдерісінде қоғамның дауысы сырт қалмай, нақты механизмге айналуы тиіс.
Ол жаңа жобадағы тағы бір мәнді қадам ретінде Преамбуланың толықтай жаңартылуын атап өтеді. Оның сөзінше, бұл өзгеріс Қазақстанның тарихи сабақтастығын, қазіргі даму бағытын және болашақ стратегиялық мақсаттарын айқындайтын маңызды норма. Сонымен қатар, Преамбула жаңаруы Конституцияның тек құқықтық құжат ретіндегі емес, құндылықтық негізін де күшейтеді.
Пікір иесінің айтуынша, мұндай тәсіл қоғам мен мемлекеттің ортақ бағдарын нақтылап, Конституцияның маңызын тек заң нормалары шеңберінен шығарып, идеялық-бағдарлық деңгейге көтереді.
Айта кетейік, Оразғалиева Арайлым — PhD докторы, қауымдастырылған профессор, «Шәкәрім университеті» КеАҚ жанындағы жастарды әлеуметтік қолдау және дамыту орталығының басшысы. Сондай-ақ ол ҚХП, ҚӘКА, облыстық Аналар кеңесі және қалалық Қоғамдық кеңес құрамында мүшелік етеді.
