Semeytany.kz — Мәжіліс қабырғасында «Ауыл» партиясы фракциясының отырысы өтіп, Қазақстан Республикасының жаңа Конституция жобасы және оған енгізілген өзгерістер жан-жақты талқыланды. Жиында маңызды құжаттың мәнін ел ішінде кеңінен түсіндіру жұмыстарын күшейту қажет екені айтылды.
Фракция жетекшісі қатысушыларды жаңа жобадағы негізгі бағыттармен таныстырып, ұсынылған құжатты мұқият зерделеуге шақырды. Сондай-ақ, қоғамда тарауы мүмкін шындыққа сәйкес келмейтін арандатушылық жарияланымдарға ермей, пікірді тек ресми мәтінге сүйене отырып қалыптастыру маңызды екені атап өтілді.
Конституциялық реформа Қасым-Жомарт Тоқаевтың Қазақстанда бірпалаталы Парламент құру жөніндегі бастамасымен тығыз байланысты. Жаңа редакцияда преамбула, 11 бөлім және 95 бап бекітілуі ұсынылып отыр. Жоба мазмұнында адам құқықтары мен бостандықтары мемлекеттің басты басымдығы ретінде белгіленіп, бірлік, ұлтаралық және дінаралық келісім мемлекеттік құндылық ретінде айқындалған. Сонымен қатар білім, ғылым, мәдениет пен инновацияны дамыту стратегиялық басым бағыт ретінде көрсетіліп, цифрлық құқықтарды қорғау және саяси институттарды қайта құруға қатысты жаңа нормалар енгізілген.
Отырыс барысында фракция депутаттары Ата Заң жобасын бірауыздан қолдап, оның құқықтық мемлекетті нығайтуға және елдің одан әрі дамуына ықпал ететінін жеткізді.
Жаңа Конституцияға қатысты түпкілікті шешім жалпыұлттық референдум арқылы қабылданады. Конституциялық комиссия жұмысы алдағы уақытта да жалғасатыны хабарланды.
