Semeytany.kz — 2026 жылғы 5 ақпанда Астанада студенттік өзін-өзі басқару көшбасшылары мен белсенді жастардың қатысуымен «Конституциялық реформа – елдің ұзақ мерзімді дамуының негізі» тақырыбында диалог алаңы өтті. Кездесу қорытындысында қатысушылар еліміздің Негізгі Заңына енгізілетін өзгерістерді толық қолдайтынын айтып, арнайы мәлімдеме жасады.
«Ауыл» партиясының Орталық аппаратында ұйымдастырылған басқосуда Мемлекет басшысы Қасым-Жомарт Тоқаев жариялаған саяси жаңғырулардың қорытынды кезеңі ретінде ұсынылған жаңа Конституция жобасы кеңінен талқыланды. Жиынды партияның Орталық аппарат басшысының орынбасары Нұрхат Ораш ашып, құжаттың идеологиялық салмағына тоқталды. Оның айтуынша, жаңа жоба «Заң мен тәртіп», «Адал азамат», «Таза Қазақстан» тұжырымдамаларын құқықтық деңгейде бекітуді көздейді.
Сондай-ақ Нұрхат Ораш жаңа Конституцияда вице-президент институтын енгізу және Құрылтайдың жаңа архитектурасын қалыптастыру секілді бастамалар билік сабақтастығы мен ұлттық басқару дәстүрін заманауи форматта үйлестіруге бағытталғанын айтты.
Диалог алаңында Еуразия ұлттық университеті, Қорқыт Ата атындағы Қызылорда университеті және Қазақ ұлттық спорт университетінен келген студенттік көшбасшылар өз ұстанымдарын білдірді. Жастар реформаларды елдің демократиялық бағытын айқындайтын, азаматтық қоғамды күшейтетін тарихи қадам ретінде бағалап, жаңа жобаның адам капиталына, білім мен инновацияға басымдық беру арқылы жас буынға әлеуметтік лифтілер мен құқықтық кепілдіктер ашатынын атап өтті.
Жиынға қатысқан сарапшылар мен саясаттанушылар Д. Прімбетов пен Е. Елемес бір палаталы Парламент пен партиялық жүйенің жандануы саяси мәдениетті жаңа деңгейге көтеретінін жеткізді. Сонымен бірге, Негізгі Заңға өзгерістер енгізудің тек бүкілхалықтық референдум арқылы жүзеге асуы мемлекеттік тұрақтылықтың маңызды кепілі екені айтылды.
Кездесу соңында қатысушылар жаңа Конституция жобасы өткенді саралап, болашаққа нық қадам жасауға мүмкіндік беретін стратегиялық таңдау деген ортақ тұжырымға келді.
