Абай облысында террористік тұрғыдан осал объектілер қатарына жатқызылған діни ғимараттардың қорғалу деңгейін қамтамасыз ету бойынша жұмыс күшейтілді. Кезекті жұмыс кездесуіне меншік иелері мен жауапты тұлғалар қатысып, қауіпсіздікті қамтамасыз етудің практикалық шараларын талқылады.
Дін істері басқармасының бастамасымен өңірдегі діни нысандардың өкілдерінің қатысуымен аралас форматтағы кеңес өтті. Семей қаласында жауапты тұлғалар офлайн режимде қатысса, аудан өкілдері мен аудандық ішкі саясат бөлімдерінің мамандары онлайн қосылды.
Жиында Абай облысы полиция департаментінің Экстремизмге қарсы іс-қимыл басқармасының жедел уәкілі, полиция капитаны Айбар Рахимов өз баяндамасында қауіпсіздікті қамтамасыз ету саласындағы заңнама талаптарына жан-жақты тоқталып, нысан басшыларының жауапкершілік аймақтарын атап өтті және төтенше жағдайлар туындаған кезде әрекет ету тәртібін түсіндірді.
Кездесу барысында белгіленген талаптарды сақтау, өткізу режимін ұйымдастыру, техникалық жарақтандыру және ықтимал қауіптердің алдын алу мәселелері қарастырылды. Қатысушылар өздерін толғандырған сұрақтарға толыққанды жауап алды.
Мұндай іс-шаралар жауапты тұлғалардың құқықтық сауаттылығы мен практикалық дайындығын арттыруға бағытталған. Діни ғимараттардың қорғалуын қамтамасыз ету бойынша жұмыс жүйелі түрде жалғасып, тоқсан сайын кездесулер мен түсіндіру жұмыстары жүргізілетін болады.
Материал Абай облысы бойынша ҰҚКД ТҚО
бөлімінің ақпараты негізінде дайындалды
