Ұлттық ойындар – ұрпақтан ұрпаққа жалғасып келе жатқан мәдени мұра ғана емес, адамның ойлау қабілетін, зейінін, сабырлылығы мен тапқырлығын дамытатын маңызды құрал.
Халықаралық қарттар күніне орай «Әділет» партиясының «Үш ұрпақ – ортақ мұрат» республикалық фестивалі аясында Семей қаласындағы №3 арнаулы әлеуметтік қызметтер көрсету және белсенді ұзақ өмір сүру орталығында «Ұлттық ойындар» зияткерлік-спорттық сайысы өтті.
Сайысқа орталықтың қызмет алушыларынан құралған 6 топ, барлығы 12 адам қатысты. Іс-шараға 100-120 адам қамтылды.
Қатысушылар шахмат, дойбы және тоғызқұмалақ бойынша өз білімдері мен шеберліктерін сынап, бірнеше кезеңнен тұратын зияткерлік сайыстарға қатысты.
Алғашқы кезеңде қатысушылар шахмат, дойбы және тоғызқұмалақ ойындарының ережелері мен ерекшеліктеріне қатысты сұрақтарға жауап берді. «Кім жылдам?» кезеңінде ойыншылар шапшаңдығын көрсетсе, «Тапқыр болсаң, тауып көр!» тапсырмасында логикалық есептерді шешті.
Ал практикалық кезеңде шахмат фигураларын дұрыс орналастыру, дойбыда жүріс жасау және тоғызқұмалақтағы отаулар мен қазанды көрсету сияқты тапсырмаларды орындады.
«Ойын шеберлері» жарысында қатысушылар үш бағыт бойынша – шахмат, дойбы және тоғызқұмалақтан жұптасып бақ сынады. Жеңімпаздар жинаған ұпайлары бойынша анықталды.
Сайыс қорытындысында «Үздік шахматшы», «Дойбы шебері», «Тоғызқұмалақ білгірі», «Ең тапқыр ойыншы», «Ең жылдам ойыншы» және «Белсенді қатысушы» номинациялары бойынша қатысушылар марапатталды.
Іс-шараға «Әділет» партиясы Абай облыстық филиалының өкілдері мен партия филиалы жанындағы «Әйелдер қанатының» мүшелері қатысты. Сонымен қатар, «Әйелдер қанатының» өкілдері қатысушыларға цифрлық сауаттылық бойынша практикалық сабақ өткізді.
«Ұлттық ойындар» сайысы қатысушылардың бос уақытын мазмұнды өткізуімен қатар, олардың зейінін, есте сақтау қабілетін, логикалық ойлауын және шапшаңдығын дамытуға бағытталды. Шахмат, дойбы және тоғызқұмалақ арқылы қатысушылар өзара тәжірибе алмасып, жарыс жағдайында ойлау мен шешім қабылдау қабілеттерін көрсетті.
«Әділет» партиясының «Үш ұрпақ – ортақ мұрат» фестивалі аясындағы бұл бастама аға буын өкілдерінің белсенді өмір салтын қолдауға, ұлттық және зияткерлік ойындарға қызығушылығын арттыруға бағытталған. Ұлттық ойындар арқылы адамдарды біріктіру, ұрпақтар сабақтастығын нығайту және қоғамдағы белсенді араласуға жағдай жасау – іс-шараның негізгі мәні болды.
«Әділет» партиясы Абай облыстық филиалының баспасөз қызметі
