Жуырда қаламыздағы Мәдениет сарайында мүгедектер күніне орай «Арнаулы әлеуметтік қызметтер көрсету орталығы» мекемесінің ұйымдастыруымен және қалалық әкімдіктің қолдауымен мүмкіндігі шектеулі жандар арасындағы «Екі жұлдыз» шығармашылық фестивалінің гала-концерті өтті.
{jcomments on}Айта кету керек, аталмыш шара Елбасы Н.Назарбаевтың мүмкіндігі шектеулі жандарды қолдау, қоғамға бейімдеу саясатын жүзеге асыру аясында, сондай-ақ, олардың арасынан дарындыларды анықтау, шығармашылық қабілеттерін ашу және жетілдіруге жағдай жасау, мүгедек балалардың мәселелеріне қоғамның назарын аудару мақсатында ұйымдастырылған болатын. Ал бұл мәдени шараның басты ерекшелігі — мүмкіндігі шектеулі жандар сахна төріне шығып, әртүрлі сайыстардың лауреаттары мен дипломанттары атанған қалалық Мәдениет үйінің әртістерімен, кәсіпқой әншілермен жұптасып өнер көрсетеді. Бұл сөз жоқ қамкөңіл жандарды қанаттандыратыны анық.
Фестивальге «Арнаулы әлеуметтік қызметтер көрсету орталығы» КММ-нен, «Асыл» қоғамдық ұйымдарынан және көмекші мектеп-интернаттардан мүмкіндігі шектеулі балалар мен аймағымызға әйгілі өнерпаздар қатысты.
Байқау бағдарламасына вокал бойынша үш кезеңнен тұратын шығармашылық сайыс кіреді екен. Сайысқа қатысу үшін 25 тапсырыс беріліпті, соның ішінен екінші кезеңге 16 жұп өткен-ді. Олар жас ерекшелігіне байланысты үш санатқа бөлініпті. Ал сайыскерлерді қалалық Мәдениет үйінің директоры, Балалар және жастар шығармашылық сарайының вокалдық студиясының жетекшісі, музыкалық колледждің хор дирижері кәсіби түрде бағалады. Міне, осылайша, екінші кезеңнен кейін санат бойынша 12 жеңімпаз анықталып, олар аталмыш гала-концертке жолдама алған болатын.
Бұл күнгі мерекелік іс-шараға көрермен ретінде қалалық әкімдік тарапынан арнайы қонақтар, өңірімізге қарасты барлық денсаулық сақтау және білім беру мекемелерінің, әлеуметтік қорғау және бағдарламалар бөлімінің өкілдері, сондай-ақ «Исток», «Асыл» қоғамдық бірлестіктерінің мамандары мен тәрбиеленушілері шақырылған еді. Шараға сонымен қатар мүгедектерге үнемі демеушілік көмек көрсетіп жүрген жеке кәсіпкерлер мен әлеуметтік қызметкерлер де келді.
Аталмыш фестиваль барысында байқағанымыз, мүмкіндігі шектеулі болса да, байқауға қатысушы өрендер кәсіби әншілерден кем ән айтпайды екен. Мәлім болғандай, олардың барлығы да арнайы жаттықтыру орындарына барып, өнерлерін ұштап жүрген ынталы жандар болып шықты.
Гала-концерт дарынды ұл-қыздардың табиғи таланттарын ұштап, болашақта қоғамнан лайықты орын табуға көмектесетіні айқын.
Қуаныш ЖОЛЫМБЕТ,
«Семей таңы»
