Сейсенбі күні қалалық Мәдениет үйінде Қазақ хандығының 550 жылдық мерейтойына орай «Арғы атам – ер түрік, біз – қазақ еліміз» тақырыбы аясында «Керей – Жәнібек» пьесасы сахналанды.
{jcomments on}Семей қаласы ішкі саясат бөлімінің қолдауымен, «Қазақстан жастарын қолдау» ШҚО жастар қоғамдық бірлестігінің ұйымдастыруымен өткен тарихи қойылымды тамашалауға көрермен қауым көп жиналды. Студент жастар мен мектеп оқушылары да қойылымды ынтызарлықпен тамашалады. Аталмыш шараны өткізудегі негізгі мақсат – Ұлы дала төсіндегі хандықтың 550 жылдық тарихын ұлықтау екенін айтады ұйымдастырушылар.
Осынау ұлан-ғайыр атырапты ақ найзаның ұшымен, ақ білектің күшімен қорғап қалған бабалар ерлігін дәріптейтін туынды 2 бөлімнен және 11 көріністен тұрады. Пьесадағы басты рөлдерді қаладағы жоғары оқу орындары мен колледж студенттері сомдаған. Ал қоюшы режиссерлер Болат Қамзин мен Гүлсара Базар екенін айта кеткен жөн. Пьеса соңында жас актерлер ұйымдастырушылардың арнайы алғыс хаттарымен марапатталды. Жастардың өнеріне тәнті болған көрермен де ыстық қошеметтерін аямады. Облыстық жастар қоғамдық бірлестігінің өкілдері бұл бағыттағы жұмыстардың алдағы уақытта да жалғасын табатынын айтады.
Ж. СҮЛЕЙМЕН,
«Семей таңы»
