Өткен сейсенбіде қалалық Достық үйінде «Ұлтаралық қатынастар мәдениеті — қазақстандық қоғамның табысты дамуының негізі» тақырыбында дөңгелек үстел өтті. Қазақстан халқы Ассамблеясының 20 жылдығына арналған шараны қалалық ішкі саясат бөлімінің қолдауымен «Исток» балалар мен жастар шығармашылық орталығы өткізді.
{jcomments on}Шараға мектеп оқушылары мен мұғалімдер, студенттер, этномәдени орталықтар өкілдері, әлеуметтанушылар мен ҮЕҰ және БАҚ өкілдері қатысты. Дөңгелек үстелге қатысушылар ұлтаралық келісімнің сақталуы, еліміздегі тұрақтылық пен достықты бекемдей түсуде ұлтаралық қатынастың алар орны жайында айтылды. Ал шараға қатысқан мектеп оқушылары мен студенттер жастар ортасындағы келісім мен төзімділік жайында өз ойларын ортаға салды.
Семей қалалық ішкі саясат бөлімінің басшысы Айдар Садырбаев атап өткендей, өзекті тақырып өзара сыйластық, келісім мен бейбітшілік мекеніне айналған Достық үйінде өткізілуі өте маңызды.
— Қазақстан қашанда достық пен бірлігі жарасқан ел болып қала береді. Дөңгелек үстелге болашақта ел тізгінін ұстайтын жасөспірімдеріміздің қатысып отыруы қуантарлық жайт. Өйткені алдыңғы буынның жастармен тәжірибе алмасып, тұрақтылық пен келісім қалыптасқан еліміздің дәстүрін дәріптеу болашағымыз үшін аса қажет. Бүгінде қазақ жерін мекен ететін түрлі ұлт пен ұлыстың барлығы еліміздің дамуына елеулі үлес қосып келеді. Оны жастарымыз да жете түсінулері қажет. Қазір Семей шаһарын сексенге тарта ұлт пен 10 конфессияның өкілдері мекендейді. Олардың барлығы тату-тәтті өмір сүруде. Дегенмен біз мұнымен шектеліп қалмай Елбасының саясатын алдағы уақытта да іс жүзінде дәлелдей отырып, осы бағытта жұмыстар атқара беруіміз керек, — деді А.Садырбаев өз сөзінде.
Дөңгелек үстел барысында қатысушылар еліміздің құқықтық мемлекет тұрғысында дамуының негізі ретінде Конституцияның басты рөліне және көпұлтты мемлекеттің нағыз тетігі болып келетін Қазақстан халқы Ассамблеясының нығайтушы мәніне ерекше тоқталды. Дискуссия кезінде тараптар ұлтаралық қатынастар мәселесіндегі Қазақстан Конституциясы нормаларының және елдің ұстанымдары мен саясатының ерекшелігін атап өтті. Себебі Қазақстан 130-дан астам ұлттан тұратын көпұлттық және көпконфессиялық ел болып табылады. Сонымен бірге жиында Конституцияның баптары мен ережелерін мүлтіксіз орындау негізінде қоғамда төзімділік, бейбіт өмірде тұрақтылықты сақтау қажеттілігі айтылды.
Асан МЫРЗАХАНОВ,
«Семей таңы»
