Шаһар басшысы алдымен университеттің «Агротехнопарк» ғылыми орталығын аралады. Заманауи, соңғы үлгідегі құрылғылармен жабдықталған орталықтың әлеуеті жоғары. Ермак Бидахметұлы агротехнологиялар, ветеринария, студенттердің кәсіпкерлік орталықтары іске қосылған технологиялар залымен, болашақ ауылшаруашылық әрі ветеринар, биотехнолог мамандарына арналған зертханамен, сондай-ақ консалтингтік орталық пен құрастырмалы жобалық бюросы сынды он алты ғылыми бөлімшелерді аралап, жұмысымен танысты.
Сонымен қатар қала әкімі университеттің «Радиоэкологиялық зерттеу ғылыми орталығы» аймақтық сынақ жүргізу зертханасына да барды. Зертхананың хромотография, масс- спектрометрия, электронды микроскопия, гамма- спектрометрия, альфа- спектрометрия, радиохимиялық даярлау сынды ғылыми бөлімшелері аталмыш сала мамандарын кәсіби түрде дайындауға бағытталған. Мұнда болашақ мамандардың ғылыммен айналысуына толықтай жағдай жа-салған десе де болады.
Ермак Сәлімов жоғары оқу орнымен танысу барысында инженерлік технологиялық факультетінде және университет мұражайында да болды. Мұражайда қала әкімі білікті маман – кадр дайындауда өзіндік орны бар университеттің терең тарихымен танысуға мүмкіндік алды. Университеттің бас ғимаратында орналасқан мұражайда оқу орны тарихы, еліміздің рухани астанасы Семей қаласына қатысты жәдігерлер де кеңінен көрініс тапқан.
Ал инженерлік факультетте технолог мамандар мен химиктер, техникалық физиктер мен жылу энергетикасы сынды сұранысқа сай мамандар даярлайтын алты кафедра ашылған.
Маржан ЫБЫРАЙҚЫЗЫ,
Семей қаласының Шәкәрім атындағы мемлекеттік университетінің
баспасөз хатшысы.
