Шәкәрім атындағы облыстық дарынды балаларға арналған № 5 мамандандырылған мектеп оқушылары мен ұстаздары жазушы, драматург, «Абай және ХХІ ғасыр» халықаралық клубының президенті, Қазақстан комсомолы сыйлығының, КСРО Жазушылар одағы сыйлығының, Колумбия университеті сыйлығының лауреаты, Бүкіләлемдік өнер және мәдениет академиясының академигі, «Аңсау», «Сағынтып жеткен жаз еді», «Тау басында түйіскен жол» сияқты повестері мен әңгімелер жинақтарының, «Өмір сүргің келсе» романының және «Өзімді іздеп жүрсем» сияқты және басқа да пьесалардың авторы, жерлесіміз Роллан Сейсенбаевпен кездесу өткізді.
Мектеп жанындағы «Огонёк» әдеби үйірмесінің жетекшісі, «Әлемдік көркем әдебиет» факультативінің оқытушысы Қарлығаш Жананбаеваның ұйымдастыруымен өткен шарада мектеп оқушылары Роллан Сейсенбаевтың «День, когда рухнул мир» романының желісі бойынша көрініс қойды. Сонымен қатар шара барысында жазушы шығармашылығы желісі бойынша Қарлығаш Мұқанқызының әзірлеуімен түсірілген оқушылардың бейнероликтері де көрсетілді.
— Роллан Шәкенұлы, сіз өз кітаптарыңыз арқылы оқырмандарыңызбен тілдесесіз. Өйткені сіздің шығармаларыңыздағы кейіпкерлеріңіз арқылы біз сіздің жан дүниеңізді тереңнен тани түстік. Кітаптарыңыздың әр бетінен рухани нәр алып, сіздің біртуар тұлға екеніңізге, қаламы қарымды жазушы екеніңізге көзіміз жетті. Сіз қаламыңызға арқау ететін негізгі тақырыбыңыз – Отан, туған жер. Қаламыңызбен туған жеріңіздің келбетін шынайы бейнелеп, бүкіл әлемге танытып жүргеніңіз көңілге қуаныш сыйлайды, — деп атап өтті Қарлығаш Мұқанқызы сөз арасында.
Кездесу барысында мектеп оқушылары жазушыға өздерінің көкейлеріндегі сауалдарын қоюға мүмкіндік алды. Сұрақтарға тереңнен жауап беріп отырған Роллан Сейсенбаев Отан, туған жер, патриоттық рух тұрғысында рухани әңгіме өрбітті.
— Туған жерге жасаған осы жолғы сапарымда Құнанбай қажы мен Айпара ананың басына арнайы барып, бабалар рухына тағзым етіп қайттым. Жалпы, біз, яғни қазақ халқы – үлкенге құрмет көрсеткен, рухы мықты халықпыз. Бабалардан мұра болып қалған рухымызды оятуымыз керек. Жастардың көзінде от ойнап, жарқырап тұруы қажет, — деді әңгіме барысында Роллан Сейсенбаев.
Сөз соңында жүздесуге ниет білдіргендері үшін жиынға қатысушыларға өзінің ризашылығын білдірген жазушы жастарға жарқын болашақ тіледі. Мектеп ұжымы да арнайы уақыт бөліп, оқушылармен кездесуге келгені үшін қаламы қарымды қаламгерге зор алғыстарын айтты.
Нұрдәулет КӘКІШЕВ,
«Семей таңы»
