20 қазан күні Семей қаласының әкімі Ермак Сәлімов Достық үйінде болып, этномәдени орталықтардың жетекшілерімен жүздесті. Кездесу аясында орталықтар өкілдері шаһар басшысына өздерін толғандырып жүрген сауалдарын жолдап, алдағы жоспарларымен бөлісті.
Бүгінде Достық үйінде 14 этномәдени бірлестік тіркелген. Биыл осындағы қазақ, татар, неміс, украин және өзге де орталықтар Қазақстан халқы Ассамблеясының 20 жылдық мерейтойын кең көлемде атап өтіпті. Қазіргі күні бірлестіктер жанынан өнердің түр-түріне баулитын үйірмелер жұмыс істеуде. Әсіресе «Айша бибі» мәдени орталығының қол өнер үйірмесі, «Исток» және «Айнхайт» ансамблі үйлесімді жұмыс істеуде. Сонымен қатар өзге де орталықтар ерекше белсенділік танытуда. Ағымдағы жылғы шаралар Қазақстан халқы Ассамблеясының 20 жылдығы аясында өтіп жатқандықтан, Достық үйінің өкілдері бекітілген жоспарға сәйкес, әр ай сайын бірнеше іс-шараларды ұйымдастырып келеді.
— Этномәдени бірлестіктер шаһардың қоғамдық-саяси өміріне етене араласып, өңірдегі ұлтаралық келісімді нығайтуда сүбелі үлестерін қосуда, — деді Достық үйінің жұмысын таныстыру барысында аталмыш мекеме директоры Аман Тілеубаев.
Сондай-ақ биыл қаламыз «Қазақстан халқы Ассамблеясы – 20 игілікті іс» республикалық эстафетасының белгі-нышаны «Тайқазанды» қабылдаған болатын. Оның аясында соғыс және тыл ардагерлеріне, әлеуметтік жағынан аз қамтылған отбасыларға материалдық тұрғыда көмек көрсетіліпті. Бұдан бөлек, Ассамблея жылы аясында Семейге «Менің Қазақстаным» пойызы келген еді. Бұл акция шеңберінде Достық үйінің маңында көшеттер отырғызылып, дөңгелек үстелдер мен ғылыми-тәжірибелік конференциялар да ұйымдастырылды. Оған қоса, «Возрождение» неміс қоғамдық ұйымының ұйытқы болуымен 15 әлеуметтік аз қамтылған жанұяға материалдық қолдау көрсетілген. Сонымен қатар 2 мүмкіндігі шектеулі жанға мүгедектер арбасы беріліпті.
Кездесу барысында сөз алған қала басшысы Ермак Бидахметұлы қазіргі жаһандық сын-қатерлі кезеңде еліміздің басты байлығы — Қазақстан халқының мызғымас береке-бірлігі, ұлттарының татулығы екендігін атап өтті.
— Қазіргі әлем бойынша этносаралық қақтығыстар әлі де болса өзектілігін жоғалтпай отыр. Кейбір елдерде бұл проблема тіптен белең алып тұр деуге де болады. Бұл ретте, біз Мемлекет басшысына шексіз алғыс білдіруіміз қажет. Себебі, Президентіміздің бастамасымен Қазақстан халқы Ассамблеясы сынды теңдессіз институт құрылды. Тәуелсіздігімізді тұғырлы етуде Қазақстан халқы Ассамблея-сының мәні мен маңызы айрықша. Тұрақтылық пен татулық — егеменді еліміздің басты байлығы. Оны сақтауда біз бар күш-жігерімізді салуымыз қажет. Бұл ретте Семейде 14 этномәдени орталықтың бір шаңырақ астында жемісті жұмыс жасап келе жатқаны көңіл қуантады. Дегенмен де, қандай да бір түйіткілді мәселелеріңіз болса, сіздерді тыңдауға әзірмін. Өз қызметтеріңізді жандандыра түсудегі ұсыныс-тілектеріңізді тыңдағым келеді, — деді Ермак Бидахметұлы.
Өз кезектерінде бірлестік мүшелері уақыттың тығыздығына қарамастан шаһар басшысының арнайы кездесуге келгеніне алғыстарын жеткізіп, Достық үйі ғимаратына ішкі әрлеу жұмыстары қажеттігі туындап отырғанын айтты. Осы орайда Ермак Бидахметұлы аталмыш сауалды назардан тыс қалдырмайтынын жеткізіп, алдағы уақытта өз шешімін табатынына сенім білдірді.
Кездесу соңында қала әкімі бір топ қоғам белсенділерін «Қазақстан халқы Ассамблеясына 20 жыл» мерекелік медалімен марапаттады.
Жақсылық МҰРАТҚАЛИ,
«Семей таңы»
{jcomments on}
