Сейсенбі күні «Спартак» стадионында мемлекеттік қызметкерлер арасында кезекті 16-шы қалалық спартакиада бастау алды. Биылғы спартакиада Қазақ хандығының 550 жылдығына арналып отыр. Жарыстың ашылу салтанатына қалалық дене шынықтыру және спорт бөлімінің басшысы Мұрат Құржықаев, спорт ардагерлері қатысып, сайыскерлерге ақ жол тіледі.
Биыл спартакиадаға жиырмадан аса команда қатысуға ниет білдіріпті. Олардың арасында қала әкімінің аппараты, ішкі саясат бөлімі, әділет басқармасы, мемлекеттік кірістер департаменті, қалалық сот, құрылыс бөлімі, қалалық прокуратура, ішкі істер басқармасы, ҰҚК, Семей қаласындағы төтенше жағдайлар басқармасы және өзге де мекемелердің жасақталған командалары бар. Қатысушылар спорттың 9 түрінен – волейбол, шағын футбол, суда жүзу, шахмат, үстел теннисі, шаңғымен жарыс, бильярд, тоғызқұмалақ және президенттік көпсайыс бойынша өзара мықтыларды анықтайтын болады. М. Құржықаевтың айтуынша, спорттық шараны өткізудегі басты мақсат – мемлекеттік қызметкерлерді салауатты өмір салтын ұстануға шақырып, бұқаралық спортты дамыту. Кейбір сайыстар бойынша алдыңғы орынға суырылып шыққан командалар белгілі болды. Мәселен, ҰҚК мен мемлекеттік кірістер департаменті командалары шахматтан ешкімге дес бермеген. Өткен жылғы бәсекеде жалпыкомандалық есеп бойынша мемлекеттік кірістер департаменті және күштік құрылымдар арасында ТЖБ — ның құрамасы топ жарыпты. Биыл да бұл ұжымдардың қарқыны жаман емес екенін айтады спартакиаданың бас төрешісі Владимир Сороко. Спартакиада келер жылдың қаңтар айында аяқталады деп жоспарланып отыр. Сондай-ақ Владимир Львович ағымдағы жылы мемлекеттік қызметкерлер арасындағы облыс-тық турнир Семей шаһарында өтуі ықтимал екендігін айтып өтті. Бұл ұсыныс ШҚО дене шынықтыру және спорт басқармасы тарапынан қолдау тапқан көрінеді.
Жақсылық МҰРАТҚАЛИҰЛЫ,
«Семей таңы»
