Мемлекет басшысы Н. Назарбаевтың бес институционалдық реформасын жүзеге асыруға бағытталған Ұлт жоспары – 100 нақты қадамын іске асыру жолында жаңа Еңбек кодексін әзірлеу қажеттігі туындаған болатын. Еңбек кодексінің жаңартылған һәм жетілдірілген түрі әзірленіп, тамыз айының соңында Мәжілістегі депутаттар қарауына жіберілген еді. Аталмыш құжат 5 бөлім, 22 тарау және 203 тармақтан құралған. Бұл жөнінде қалалық ақпарат орталығында өткен арнайы баспасөз мәслихатында мәлім болды.
Баспасөз мәслихатына қалалық ішкі саясат бөлімінің бас маманы Юрий Осьмаков, Семей аймақтық салалық кәсіподақтардың координациялық кеңесінің төрағасы Сәбит Ибраев, Семей аймақтық білім қызметкерлері кәсіподақтарының заңгері Әлімбек Куюбаев және облыстық денсаулық сақтау ұйымдары кәсіподақтары басшысының орынбасары Альфия Сайфутдинова қатысты.
{jcomments on}Елбасының бес институционалдық реформасын жүзеге асыру бағытындағы Ұлт жоспары – 100 нақты қадамының 83-ші қадамында еңбек қатынастарын ырықтандыру, жаңа Еңбек кодексін әзірлеу қарастырылған. 83- қадамдағы тапсырма бойынша ұжымдық еңбек қатынастарын қайтадан қарастыру қажеттілігі туындаған еді. Осы ретте білікті мамандардан жасақталған арнайы топ заң жобасын әзірлеп, қоғам талқысына ұсынған еді. Жаңа Еңбек кодексінің алғашқы нұсқасымен танысқан кәсіподақ өкілдері онда жұмыс берушілерге едәуір басымдылық берілгенін алға тартып, өз ой – пікірлерін білдірген екен. Осы олқылықтарды түзеу мақсатында түрлі деңгейдегі кәсіподақтар 200-ге тарта ұсыныс жіберіп, оның 117-сі мақұлданған.
— Жаңа Еңбек кодексіне сәйкес қатардағы қызметкерлердің құқығын қорғауда кәсіподақтардың рөлі зор болмақ. Сондай-ақ жаңа Еңбек кодексінің шеңберінде жұмыс беруші мен жұмысшы арасындағы теңдік жақсара түсетініне сенімдіміз. 150 бапқа қысқарған кодекс бойынша жұмысқа тұрған азамат басшысымен ақылдасып еңбек шартын өзіне ыңғайлы етіп толтыруына мүмкіндік береді. Дей тұрғанмен бастапқы кезеңде, құжатты талқылау барысында, біз оның кейбір тұстарын әлі де жетіл-діре түсу керектігіне көз жеткіздік. Ол әсіресе демалыс және мереке күндері істелетін қосымша жұмыс турасында болды. Мәселен, алғашқы жобада артық сағатқа төленетін үстемеақыны қысқартып тастау көзделген болатын. Бұл орайда біз, Республикалық кәсіподақтар ретінде, өз ұстанымымызды білдірдік. Бірқатар келіссөздерден кейін үстемеақының көрсеткіші 1,5% деңгейінде қалатындығы шешілді. Мәселен, түнгі уақытта жұмысқа шығатын қаншама азаматтар бар. Ал тәуліктің бұл мез-гілінде жұмыс істеудің денсаулыққа кері әсері бар екені мәлім. Сол себепті бұл санаттағы жұмысшылардың жалақысы лайықты деңгейде болуы қажет. Бұған қоса еңбек шарттарын қадағалау мақсатында қоғамдық бақылау күшейе түседі деп жоспарланып отыр. Осы ретте қоғамдық инспекторлардың рөлі айрықша болмақ, — деп атап өтті Семей аймақтық салалық кәсіподақтардың координациялық кеңесінің төрағасы С. Ибраев.
Мәжілісмендердің қарауынан өткен жаңа Еңбек кодексі таяу арада ҚР Парламенті Сенатының талқылауына жіберіледі деп көзделуде.
Ж. СҮЛЕЙМЕН,
«Семей таңы
