Жалпы, Семей қаласын көріктендіру, көркейту мәселесі қашанда күн тәртібінен түскен емес. Әсіресе ағаш отырғызып, шаһарды жасыл желекпен көмкеруде қоғам болып атсалысу қажет. Міне, осы ретте өткен жұма күні ЕХРО-2017 көрмесін қолдау мақсатында игілікті шара өтті.
Семей қаласын гүлдендіруге бағыт-талған ағаш отырғызу акциясы шаһардағы жаңадан бой көтерген Жедел медициналық жәрдем ауруханасы аумағында ұйымдастырылды. Семей қаласы әкімдігінің қолдауымен «Город F» ақпараттық порталы ұйымдастырған акция ЕХРО-2017 көрмесін қолдау мен шаһарды көгалдандыру мақсатында өткізілді. Бұл игілікті шарадан кәсіпкерлер де шет қалмаған екен. Қаламыздың қалталы азаматтары ағаштар мен жас көшеттерге нәр беретін қара топырақтың жеткізілуіне көмек көрсеткен. Акцияға аталмыш порталдың белсенділері мен қала әкімінің орынбасары Надежда Шарова қатысты.
— Шараны ұйымдастырып отырған жастар ұйымдары мен демеушілерге қала әкімі атынан алғысымды білдіремін. Айта кетуіміз керек, бүгінгі күні «Город F» ақпараттық порталы — 70 мыңнан астам оқырмандары бар ауқымды пікір алмасу алаңы. Бұл атқарушы билік пен халық арасын байланыстырып, ашық пікір алмасуға мүмкіндік береді. Аталмыш топта қаланың өзекті мәселелері талқыланып қана қоймай, сонымен қатар оларды шешу жолдарының сөз болатыны қуантады. Бүгінгі шара дәстүрлі түрде жалғасын табуы керек. Өйткені біз шаһарымызды жасыл, таза, көрікті әрі әдемі еткіміз келеді, — деді өз сөзінде Надежда Шарова.
«Город F» ақпараттық порталы, жоғарыда айтылғандай, шаһарымыздың өзекті деген мәселелерін көтеріп келеді. Портал семейліктерді біріктіріп қана қоймай, маңызды жаңалықтардан құлағдар етеді. Портал жетекшісі Жасұлан Құрманғалиевтің айтуынша, ағаш отырғызу шарасын аталмыш топтың белсенділері алғаш рет өткізілуде.
— «Город F» ақпараттық порталы осындай акцияны алғаш рет өткізіп отыр. Болашақта жылына екі мәрте ағаш егуді дәстүрге айналдырсақ, қаланы жасылдандыруға өз үлесімізді қос- қан болар едік. Ағаш отырғызу шарасына қолдау білдірген барша семейліктерге алғысымды білдіремін, — дейді Жасұлан Құрманғалиев.
Акция барысында қала әкімінің орынбасары Надежда Шарова алғаш болып жас көшет отырғызды. Шаһарымызды гүлдендіруге бағытталған ағаш отырғызу бастамасы қаланың басқа да жерлерінде жалғасын тапса құба-құп. Ең бастысы, табиғатты аялау әрқайсысымыздың міндетіміз екенін ұмытпайық.
Асан МЫРЗАХАН,
«Семей таңы»
