Қазақ хандығының 550 жылдығына арналып Семейдің облыстық тарихи-өлкетану музейінде жыл басынан бері бірқатар іс – шаралар ұйымдастырылып, ғылыми — танымдық шаралар өткізілді. Осы маңызы зор танымдық шаралардың, көрмелердің, кездесулердің қорытындысы ретінде Қазақ хандығының 550 жылдығына арналып «Замана мәйегі» көрмесі ұйым—дастырылуда.
Бұл көрмеде халқымыздың асыл мұралары, құнды жәдігерлері саналатын қазақтың киелі қара шаңырағы киіз үй, күнделікті тұр-мыста қолданылатын үй жиһаздары, ұлттық ою-өрнектер салын-ған сырмақ, текемет, алаша, тұскиіз сияқты қолөнер бұйымдары қойылған. Сонымен қатар ұлттық тағамдар, ата — бабаларымыздың тұрмыста пайдаланған заттары, кең даланы күмбірлетіп күйге бөлеген саз аспаптары, қазақ халқының сән — салтанатының, мәдениетінің озық үлгілерін танытатын ұлттық киімдері, асыл тастардан жасалған зергерлік әшекей бұйымдары да көрмеден орын алды. Баһадүр батырлардың көне қару-жарақтары да көрерменнің көзайымына айналады деп күтілуде. Ұлттық салт – дәстүрді насихаттау мақсатында халықтық мерекелер, ұлттық спорт пен ойын түрлері де көрсетіледі. Бұл көрменің ерекшелігі – экспозицияда көрсетілген аталған жәдігерлердің көбі панорама түрінде беріліп, кейбірінің жасалу жолдары мен қолдану әдістері экскурсия барысында айтылады. Ал көптеген жәдігерлер жайлы мәліметтер теледидар және сенсорлық киоск арқылы беріледі.
Көрменің мақсаты – Ұлы Даланы мекен етушілердің жоғары мәдениетін, үздік әдет-ғұрыптары жайлы тек әңгімелеп қана қоймай, өмірде қолдану әдістерімен таныстыру. Аталған көрме музей қорының негізінде құрылған.
Көрме қараша айының ортасынан желтоқсан айының ортасына дейін музейдің көрме залында өтеді. Баршаңызды осы көрмемен танысуға шақырамыз!
Ләззат ӘЛЖАН, Семейдің облыстық тарихи – өлкетану музейінің бөлім басшысы.
