Семей қалалық әкімдігінде қалалық кәсіпкерлік бөлімінің басшысы Марат Нүгеровтің төрағалығымен «Өнімділік — 2020» бағдарламасы шеңберінде мемлекеттік қолдаудың жаңа мүмкіндіктерін таныстыру мақсатында семинар-кеңес өткізілді. Семинарға қалалық кәсіпкерлік бөлімінің мамандары, кәсіпорын басшылары және кәсіпкерлер қатысты.
Аталмыш жиында «Қазақстан индустриясын дамыту институты» АҚ басқарма төрағасының орынбасары Талғат Тұрлыбаев және қолдау құралдарының орталығы директорының орынбасары Диас Серіков шаһардың кәсіпорын басшылары мен өкілдеріне бағдарламаның жаңа мүкіндіктері бойынша түсініктеме берді. Семинар-кеңесте алғаш болып сөз алған «Қазақстан индустриясын дамыту институты» АҚ басқарма төрағасының орынбасары Талғат Тұрлыбаев «Өнімділік — 2020» бағдарламасы аясында мемлекет тарапынан берілетін жеңілдіктің маңыздылығына тоқталды.
— Қазіргі заманда жоғарғы еңбек өнімділігін алу өте маңызды. Сондықтан да мемлекет аталмыш салаға серпін беріп, қолдау көрсетіп келеді. Осы мақсатта Үкімет тарапынан әртүрлі бағдарламалар да іске асырылып жатқанын жақсы білесіздер. Солардың бірі «Өнімділік — 2020» бағдарламасы кәсіпорындарды бәсекеге қабілетті етіп, еңбек өнімділігін арттыруға септігін тигізуде, — деді «Қазақстан индустриясын дамыту институты» АҚ басқарма төрағасының орынбасары Талғат Тұрлыбаев.
Семинарда «Қазақстандық индустрияны дамыту институты» АҚ-ның қолдау құралдар орталығы директорының орынбасары Диас Серіков «Өнімділік — 2020» бағдарламасына Қазақстан Республикасы Үкіметінің қаулысымен енгізілген өзгерістер туралы баяндады. Оның айтуынша, «Өнімділік — 2020» бағдарламасы еңбек өнімділігін арттыру мақсатында өндірісті жаңғыртуға және экономиканың басым секторларында өнеркәсіп кәсіпорындарының бәсекеге қабілеттілігін арттыруға бағытталған.
— ҮИИДМБ-ны жүзеге асырудың базалық құралдарының бірі «Өнімділік-2020» бағдарламасы болып табылады. Оны жүзеге асырудың бірінші кезеңінде кәсіпкерліктің жүзден астам субъектісіне шығындар қайтарылды. Екінші кезең басталғаннан бері кәсіпорын энергоаудит өткізуге, кадрларды оқытуға, шетелдік мамандарды тартуға жұмсаған және өзге де шығындарын қайтарып алды. Бүгінде өңірлерде кәсіпкерлер мүмкіндіктерге қол жеткізу мақсатында ұсынымдар әзірлеуде. Оның үстіне ұсыным берген күннен бұрынғы 6-12 ай кезеңінде болған ескі шығындары да өтеуге болады. Ол кәсіпкерлерге15 жұмыс күннің ішінде қайтарылады, — дейді «Қазақстандық индустрияны дамыту институты» АҚ-ның қолдау құралдар орталығы директорының орынбасары Диас Серіков.
Бір сөзбен айтқанда, бизнес кеңеске қатысушыларға бағдарламаға қатысу тетіктері мен талаптары жан-жақты түсіндіріліп, мемлекеттік қолдау шаралары ұсынылды. Ал қатысушылар бағдарлама аясында қызығушылық танытқан сұрақтарына жауаптар алды.
Асан МЫРЗАХАНОВ,
«Семей таңы»
