Семей қаласының Шәкәрім атындағы мемлекеттік университетінде «Нұр Отан» партиясы Семей қалалық филиалы жанындағы «Жас Отан» Жастар қанатының есеп беру – сайлау конференциясы өтті. Іс-шараға Шығыс Қазақстан облыстық «Жас Отан» жастар қанатының төрайымы Бақыт Маржан, ішкі саясат бөлімінің басшысы Айдар Садырбаев, қалалық «Жас Отан» жастар қанатының төрайымы міндетін атқарушы Арайлым Ержанқызы және жоғары оқу орындары мен колледж студенттері қатысты.
Конференцияда «Жас Отан» жастар қанатының осы уақытқа дейін атқарған жұмыстары жөнінде баяндама жасалды. 2008 жылдан бері жұмыс істеп келе жат-қан жастар ұйымының қатары жылдан- жылға артып келеді. Осы ретте ұйымның ағымдағы жылы атқарған жұмысын қорытындылаған Арайлым Ержанқызы белсенді жастардың мұрындық болуымен шаһарда айтарлықтай жұмыстар атқарылып жатқанын жеткізді.
Оның айтуынша, жыл сайын белсенді жастар дәстүр бойынша соғыс және тыл ардагерлеріне қолғабыс етіп келеді. Сонымен қатар ағымдағы жылы «Бақытты балалық» акциясы аясында көпбалалы және әлеуметтік тұрғыдан әлжуаз отбасыларға қолдау жасалыпты. Жасотандықтар республикалық, облыстық деңгейдегі ауқымды шараларға да белсенді түрде қатысып отырады. Сонымен қатар құқық қорғау органдары, қалалық әкімдік, ұстаздар мен медицина қызметкерлерімен де тығыз әріптестік байланыс орнатылған. Арайлым Ержанқызының сөзіне сүйенсек, жастардың бос уақыттарын тиімді пайдалану мақсатында да бірқатар танымдық жобалар жүзеге асырылған.
Конференция барысында жасотандықтардың Семейдегі жаңа көшбасшысы таныстырылды. Енді жастар ұйымының көшін Семей қаласының Шәкәрім атындағы мемлекеттік университетінің студенті Айдос Төлеуханов бастамақ. Шара барысында алғашқы құттықтау сөзін қалалық ішкі саясат бөлімінің басшысы А.Садырбаев жеткізді.
— Ең алдымен осы уақытқа дейін «Жас Отан» жастар қанатын басқарып келген Арайлым Ержанқызына алғыс білдіремін. Алдағы уақытта да ол осындай өнегелі істердің басы-қасынан табыла біледі деген ойдамын. Ал Айдосқа тек қана ақ жол тілейміз, — деді А.Садырбаев. — «Жас Отан» жастар қанатының үш мәрте республикалық съезі өткізілгенде, оның екеуінде семейлік жастар биік мінберден өз тұшымды ойларын білдіргенін атап өткен абзал. Бұл — жақсы жетістік. Ол жерлестеріміздің абыройы қаншалықты дәрежеде екендігін білдіреді. Қаламызда жүз мыңға тақау жастар бар. Олардың бел ортасында сіздер барсыздар. Замандастарыңыздың көкейінде жүрген мәселелерімен сіздер жақын таныссыздар. Ал жиындарға жай ғана қатысып, жаттанды сөздерді ұрандатып айтқаннан пайдалы нәтиже шықпайтынын қаперлеріңізден шығармаңыздар, — деді Айдар Серікқазы-ұлы.
Өз кезегінде жаңадан тағайындалған төраға көпшіліктің алдында өзіне артыл-ған сенімді ақтайтынын жеткізді. Сондай-ақ жастар ұйымының 2016 жылы қолға алатын жоспарлы істері айқындалды.
Жақсылық МҰРАТҚАЛИҰЛЫ,
«Семей таңы»
