15 қараша — ұлттық валюта — теңге күні. Жыл сайын атап өтілетін осынау кәсіби мерекеге орай, Семей қаласының әкімі Ермак Сәлімов өңіріміздегі қаржы саласына өзіндік үлестерін қосып келе жатқан бірқатар мамандарды салтанатты түрде марапаттап, қаржыгерлерді арнайы құттықтады.
Салтанатты жиынға қалалық әкімдіктің экономика және бюджеттік жоспарлау, қаржы бөлімдері мен қазынашылық басқармасының қызметкерлері, мемлекеттік зейнетақы төлеу орталығы мен банк қызметкерлері қатысты.
Жиын беташарында құттықтау сөз алған қала әкімі Ермак Бидахметұлы:
— Еліміздің экономикалық қуатын еселеп, тұрғындардың әлеуметтік жағдайын арттыру қаржы саласындағы жемісті еңбекпен тікелей байланысты. Бүгінгі таңдағы бұл же-тістіктерге семейлік қаржы саласы қызметкерлерінің де қосқан үлесі аз емес. Осы орайда сіздерге тілерім: мерекелеріңіз құтты болсын, еңбектеріңіз әрдайым табысты бола берсін. Сіздерді кәсіби мерекелеріңізбен шын жүректен құттықтаймын. Ел игілігі жолында әрдайым қарышты қадаммен жаңа жетістіктерге жете беріңіздер, — деді қала басшысы өз құттықтауында.
Осыдан 22 жыл бұрын 15 қараша күні тәуелсіз Қазақстан мемлекеті өзінің төл валютасын айналымға енгізгені белгілі. Сол кезден бастап бұл күн қаржы саласының кәсіби мерекесі саналады. Кездесуде аталып өткендей, білікті қаржыгерлер ел экономикасының дамуында маңызды рөл атқарады. Өйткені бюджеттің сауатты жұмсалуы тікелей осы сала қызметкерлеріне байланысты. Маңыздылығы зор мамандық иелері осылайша, мерекелеріне орай, қала әкімінің марапатына ие болды. Өз саласының үздіктеріне шаһар басшысы «Қазақстан Конституциясына 20 жыл» төсбелгісі мен қала әкімінің Құрмет грамотасын және алғыс хаттар табыстады. Ал аталмыш сала қызметкерлері өз кезектерінде көрсетілген құрмет үшін қала әкімі Ермак Бидахметұлына алғыстарын білдірді. Солардың бірі — Семей қаласындағы мемлекеттік зейнетақы төлеу орталығының аға маманы Бәтимаш Жетпісбаева.
— Барша қазақстандықтарды Ұлттық валюта — теңге күнімен құттықтаймын. Теңгеміздің тұғыры қашанда биік болсын. Мерекеге орай қаржы саласының мамандарын арнайы құттықтап отырған Семей қаласының әкімі Ермак Бидахметұлына айтар алғысымыз зор. Барша қазақстандықтарға саулық, молшылық, келісім мен тыныштық тілеймін. Еліміздің өркендеу жолына әлі де қарқынды еңбек ете беретін боламыз, — деді өз пікірінде Бәтимаш Мұқанқызы.
Асан МЫРЗАХАН,
«Семей таңы»
