Семей қалалық мәслихатының кезекті қырық алтыншы сессиясы болып өтті. Сессия жұмысына қала әкімінің орынбасары Қайрат Ерембесов, әкімдікке қарасты және өзге де бірқатар мекемелердің басшылары қатысты.
Сессияның күн тәртібінде екі мәселе қаралды. Алдымен «Семей қаласының аумағын дамытудың 2011-2015 жылдарға арналған бағдарламасын бекіту туралы» қалалық мәслихаттың 2010 жылғы 29 желтоқсандағы шешіміне өзгеріс енгізу туралы мәселе бойынша қалалық экономика және бюджеттік жоспарлау бөлімінің басшысы Гүлжан Алтынбекова баяндама жасады. Гүлжан Қайырханқызының айтуынша, Семей қаласының аумағын дамытудың 2011-2015 жылдарға арналған бағдарламасы жаңа редакцияда әзірленген. Сонымен қатар жаңа нысаналы индикаторлары және тікелей нәтиженің көрсеткіштері енгізіліпті. Депутаттар аталған жобаны бір ауыздан қолдады.
Сонымен қатар сессияда Семей қаласы мәслихатының 2014 жылғы 5 наурыздағы «Семей қаласы мәслихатының 2010 жылғы 21 сәуірдегі «Тұрғын үй көмегін көрсету жөніндегі қағиданы бекіту туралы» шешіміне өзгерістер енгізу туралы шешімінің күші жойылды. Сессияда көтерілген сұрақтарды қалалық мәслихат депутаттары бір ауыздан қолдады және шешім шығарды.
А.САМАТҰЛЫ,
«Семей таңы»
