Сәрсенбі, 25 қараша күні қаладағы Зейнеткерлерге әлеуметтік қызмет көрсету аумақтық орталығында 1 желтоқсан — ҚР Тұңғыш Президенті күніне орай Семей қаласының облыстық тарихи – өлкетану музейінің қызметкерлері қарияларға арнайы дәріс оқыды.
Алдымен Семей қаласының облыстық тарихи — өлкетану музейінің жетекші маманы Гүлнұр Қожахметова қариялар-ға ҚР Тұңғыш Президенті күнінің мәні мен маңыздылығына тоқталды.
— 1 желтоқсан — ҚР Тұңғыш Президенті күні — елімізде айрықша аталып өтетін мерейлі мереке. Өйткені 1991 жылы 1 желтоқсан күні алғашқы президенттік сайлау өтіп, Нұрсұлтан Әбішұлы Назарбаев жеңіске жеткен еді. Ал 10 желтоқсан күні Алматы қаласындағы ұлықтау рәсімінде Елбасына өзінің ақ батасын жерлесіміз, халық ақыны Шәкір Әбенов арнады. 24 жыл ішінде мемлекетіміз талай сындарлы кезеңді басынан өткізді. Бұл сынақтардан елімізді сүріндірмей алып шыққан бірден — бір тұлға, әрине, Н. Назарбаев. Бүгінде Елбасы зайырлы мемлекетіміздің тәуелсіздігі мен ел тұрақтылығының кепіліне айналып үлгерді, — деп атап өтті Г. Қожахметова.
Дәріс барысында көнекөз қарияларға Елбасы жайында шағын деректі фильм мен слайд көрсетілді. Сондай-ақ Г.Қожахметова осындай кездесулерді өзге де мекемелерде ұйымдастыру жоспарланып отырғанын жеткізді. Ал музейде Тұңыш Президент күніне арнал- ған арнайы зал ашылған екен.
Ж. СҮЛЕЙМЕН,
«Семей таңы»
