Р. Байсеитов атындағы Семей қаржы-экономикалық колледжінде «Мұратымыз – Мәңгілік Ел» ұранымен «Патриоттық тәрбие мен инновациялық технология – қазіргі заманауи білім берудің негізі» тақырыбында қалалық жастар форумы өтті. 1 желтоқсан — ҚР Тұңғыш Президенті күніне орай ұйымдастырылған шараға қалалық ішкі саясат бөлімі басшысының орынбасары Нұржан Есенжолов, Р. Байсеитов атындағы Семей қаржы-экономикалық колледжінің директоры Думанғазы Арғынғазин және қаланың белсенді студент жастары қатысты.
Форумды өткізудегі басты мақсат – заманауи білім берудегі инновациялық технологияларды қолдану арқылы жастарды отансүйгіштікке тәрбиелеу. Жиынның ашылу салтанатында кіріспе сөз алған колледж директоры Д. Арғынғазин Елбасының «Қазақстан — 2050» Стратегиясында мемлекетімізді 30 дамыған елдің қатарына қосу туралы бастамасы қоғам тарапынан қолдау тапқанын жеткізіп, осы жолда жастардың да жұдырықтай жұмыла атсалысулары қажеттігін атап өтті. Сондай-ақ форумда қалалық ішкі саясат бөлімі басшысының орынбасары Н. Есенжолов та лебіз білдірді.
— Құрметті студенттер! Биыл еліміздің Тәуелсіздігіне 24 жыл толғалы отыр. Сіздер бақыттысыздар. Себебі осындай тұғыры биік дербес мемлекеттің азаматтарысыздар. Біз көрші елдермен достық қарым-қатынастамыз. Бұл әуелі Мемлекет басшысының ұстанған салиқалы сарабдал саясатының арқасы деп білуіміз қажет. Осы жиынға қатысушылардың барлығына сәттілік тілеймін. Ең бастысы, форумнан өздеріңізге пайда алып қалуға тырысыңыздар. Барлықтарыңызды алдағы келе жатқан 1 желтоқсан — ҚР Тұңғыш Президенті күні және еліміздің басты мейрамы Тәуелсіздік күнімен құттықтаймын, — деді Нұржан Ерғалиұлы.
Пленарлық отырыс барысында қатысушылар Елбасының «Мәңгілік Ел» идеясы мен Бес институционалды реформаны жүзеге асырудағы «Ұлт Жоспары – 100 нақты қадам» бағдарламасы турасында баяндама жасап, стратегиялық жоспарды орындауда шаһар жастарын бір жеңнен қол, бір жағадан бас шығаруға үндеді. Мәселен, Р.Байсеитов атындағы Семей қаржы-экономикалық колледжінің студенті, іс-шара ұйымдастырушыларының бірі Балнұр Мұқанова Ұлт Көшбасшысының қолға алған реформалары қазақ елін кемел келешеке жеткізетінін дәйекті түрде атап көрсетіп, жастар әрдайым Қазақстан Президентін қолдайтынын айтып өтті.
— Біз осы шараны өткізу арқылы жастар бойындағы патриотизмді ұштауды көздеп отырмыз. Бүгінде елімізде білім беру саласы жақсы жолға қойылған. Мәселен, оқыту барысында түрлі инновациялық технологиялар қолданылады. Жастардың көшбасшылық қабілетін арттыруға қолайлы мүмкіндіктер қарастырылған. Осы форумнан студенттер пайдалы ой түйеді деген сенімдемін, — дейді Б. Мұқанова.
Жақсылық МҰРАТҚАЛИҰЛЫ,
«Семей таңы»
