1 желтоқсан — Қазақстан Республикасының Тұңғыш Президенті күнін мерекелеу шарасы Семей қаласында ресми түрде басталып кетті. Осы орайда елдігіміздің нышаны саналар елеулі мейрам құрметіне Абай атындағы кітапханада Елбасы Нұрсұлтан Назарбаевтың өмірі мен шығармашылығын және әлемдік деңгейде зор ықпалы бар сындарлы саясатын таныстыру һәм насихаттау мақсатында «Әлемдік деңгейдегі тұлға» атты тақырыпта үш бөлімнен тұратын кітап көрмесі ұйымдастырылды.
Аталмыш шараның шымылдығы ең әуелі өңіріміздегі мәдениет саласының ардагері Құсмілия Нұрқасымның Елбасына арнауымен ашылды. Осыдан соң кітап көрмесінің ресми бөлімі орын алды.
Жалпы, Н.Ә. Назарбаевтың сан тараулы өмір жолын бейнелейтін бұл кітап көрмесінің баса атап өтер бірқатар ерекшеліктері бар екен. Мәселен, «Елбасының Нұрлы жолы» атты саяси тақырыпты астар еткен бөлімде Ұлт Көшбасшысының өмір жолы, қарапайым азамат ретіндегі қыры көрініс тапқан. Ал алғаш билікке араласқан жылдарынан бастап жаһандық деңгейдегі көшбасшы ретіндегі келбетін көрсететін әдебиеттер келесі бөлімнен орын алыпты. «Н.Ә. Назарбаевтың қызмет хроникасы» атты бұл бөлімде Тұңғыш Президенттің елімізді басқаруда атқарған ұлан-ғайыр істері мен сұңғыла саясаткерлігін, Тәуелсіздіктің алғашқы қиын-қыстау жылдарынан бастап бүгінгі қарышты даму жолдарындағы атқарған қызметтері жайлы баяндайтын кітаптар оқырман назарына ұсынылыпты. Атап айтсақ, «Размышление о Лидере», М. Қасымбековтің «Елін сүйген, елі сүйген Елбасы», «Первый Президент Республики Казахстан. Хроника деятельности 1990 — 2011гг», «Кемеңгер», «Қазақстан даму стратегиясы», Н.Ә. Назарбаевтың «Халыққа арнау. Слово к народу», «Қалың елім, қазағым», «Ой бөлістім халқыммен», «Тарих толқынында» және өзге де кітаптары мен мерзімді басылымдар көрмеге қойылыпты. Әде-биеттер арасында ел Тәуелсіздігінің ал-ғашқы сындарлы жылдарындағы Елбасының қайраткерлік қырын ерекше сомдайтын туындыларға баса мән беріліпті.
Ал Президентіміздің Қазақстанның өз Тәуелсіздігін алғаннан кейінгі қысқа мерзімнің ішінде геосаяси кеңістік жүйесінен өз орнын табуы, өзінің ұлттық-мемлекеттік мүдделерін қалыптастыруы, сыртқы саяси басымдықтарының жүйесін құруы және сыртқы саяси стратегиясының негіздерін қалау бағытында мол мағлұмат беретін басылымдар көрменің «Н. Назарбаевтың сыртқы саясаттағы рөлі» бөлімінен орын алыпты. Бұл ретте, «Әлем Қазақстан туралы, Президент туралы», «Президент Н.А.Назарбаев и современный Казахстан», «Н.А.Назарбаев и внешняя политика Казахстана» кітаптары оқырман қауым үшін маңызды құжаттар болмақ.
Аталмыш көрмеге қаламыздағы жоғары оқу орындары мен колледж студенттері келіп, қойылған туындыларды тамашалады.
Қуаныш ЖОЛЫМБЕТ,
«Семей таңы»
